Фаластин миллий маъмурияти раҳбари Маҳмуд Аббос сўнгги қуролли можарода жабр кўрган Ғазо секторини тиклаш учун тўрт миллиард доллар миқдорида ёрдам беришини сўраб, халқаро ҳамжамиятга мурожаат қилишни мўлжалламоқда. Бу ҳақда Reuters агентлигига таяниб, «РИА Новости» хабар бермоқда.
Фаластин мансабдор шахсларининг ҳисоб-китобига кўра, яқинда 50 кун давом этиб, 2,1 мингдан зиёд кишининг умрига зомин бўлган қарама-қаршилик натижасида 60 мингдан зиёд турар-жой ҳамда 5000 дан кўпроқ корхона ва тижорат муассасалари барбод этилган ёки зарар етказилган.
Фаластинликларга ёрдам кўрсатиш билан боғлиқ масалаларни муҳокама қилиш учун донор мамлакатлар 12 октябрь куни Қоҳирада учрашади.
Шу билан бир вақтда, Исроил ҳарбий кучлари Бош штаби раҳбари Бенни Ганс Ғазо секторини тиклаш унинг мамлакати манфаатлари билан ҳам мос тушишини, шу боис анклавга етказиладиган маҳсулотларга қўйилган чекловларнинг бир қисми бекор қилиниши лозимлигини айтди.