Ўзбекистон Республикаси Давлат солиқ қўмитасида давлат солиқ хизмати органлари фаолиятининг I чорак якунларига бағишланган кенгайтирилган Ҳайъат йиғилиши ўтказилди. Бу ҳақда Давлат солиқ қўмитаси матбуот хизмати хабар берди.
Йиғилишда 2014 йил I чораги учун белгиланган прогноз кўрсаткичларининг ижроси танқидий кўриб чиқилди. Бюджет ва бюджетдан ташқари мақсадли жамғармаларга тушумларни таъминлашда камчиликларга йўл қўйган Наманган, Самарқанд, Сирдарё ва Андижон вилоятлари давлат солиқ органлари раҳбарларининг ҳисоботлари эшитилиб, уларнинг мазкур йўналишдаги фаолияти қониқарсиз, деб топилди ҳамда II чорак прогноз кўрсаткичларини сўзсиз бажаришга доир чора-тадбирлар белгилаб олинди.
Муҳокамада марказий аппарат таркибий тузилмалари ва ҳудудий давлат солиқ хизмати органлари раҳбарларининг ҳисоботлари эшитилиб, фаолиятида камчиликларга йўл қўйган уч нафар раҳбар ходим эгаллаб турган лавозимидан озод этилди, 32 нафарига нисбатан тегишли интизомий жазо чоралари қўлланилди. Бундан ташқари, давлат солиқ хизмати органлари зиммасига юклатилган долзарб вазифаларни сифатли бажариш юзасидан тегишли қарорлар қабул қилинди.
Шу билан бирга, солиқ тўловчи жисмоний шахслардан 2013 йилги жами йиллик даромадлари тўғрисидаги декларацияларни қабул қилиш натижалари сарҳисоб қилиниб, Фарғона ва Жиззах вилоятларида бу борадаги тадбирлар тўлиқ якунланмагани учун мутасадди раҳбарларнинг масъулияти кўриб чиқилди.
Изоҳ (0)