Twitter микроблоглар сервисида рўйхатдан ўтган фойдаланувчилар кўп, аммо уларнинг кўпчилиги бирор фаоллик намоён этмайди, деб ёзади Wall Street Journal газетаси.
Ҳозирги кунда микроблоглар хизматининг 972 миллион нафар фойдаланувчиси мавжуд, бироқ улардан 44 фоизининг профилида битта ҳам твит ёзилмаган. Бу факт бутун дунё бўйлаб барча шаҳарлардаги нуфузли микроблогерларни излаш билан шуғулланувчи Twopcharts.com сервиси ҳисоботларидан маълум бўлди.
Аниқланишича, Twitter фойдаланувчиларининг 30 фоизи биттадан ўнтагача твит ёзишган. 100 дан ортиқ твит ёзганлар эса атиги 13 фоизни ташкил этади. Сервисдан фаол фойдаланиб келаётганлар сони 542,1 миллион кишига етади; улардан 23 фоизи кейинги бир ой давомида камида биттадан твит ёзган.
TJournal нашрининг таъкидлашича, Twopchart сервиси фойдаланувчи ўз аккаунтидан қачон фойдаланганлиги, унга қанчалик тез-тез кириб туриши кабиларни аниқлай олмайди. У профил эгасининг фаоллигини бирор твит қолдирганлиги ва бошқаларнинг профилларидан ретвит қилганлигига қарабгина аниқлай олади.
Фойдаланувчининг ўз аккаунтига киришларини фақат Twitter’нинг ўзигина аниқлаши мумкин. 2013 йилнинг охирги уч ойи статистикасига қараганда, Twitter’нинг 241 миллион нафар аъзоси камида ойда бир марта ўз профилига кирган.
Айтиш керакки, Twopcharts тақдим этган маълумотларни Twitter тасдиқлагани йўқ. Микроблоглар хизмати маъмурияти учинчи шахслар тўплаган статистикани изоҳламаслигини маълум қилди.
Wall Street Journal газетасининг эслатиб ўтишича, твит ёзмаслиги кишининг бу сервисдан фойдаланмаслигини англатмайди. Кўпчилик аъзолар ўзлари қизиққан аккаунтларнинг янгиликларига обуна бўлиб қўйишган ва уларни ўқиб, биронта изоҳ ёзмасдан чиқиб кетишлари ҳам табиий ҳол.
Изоҳ (0)