Teleboshlovchi va bloger Husnora Shodiyeva ijtimoiy tarmoqlarda chiqish qilib, YPX xodimi uni haqorat qilganini aytgandi. Poytaxt YHXB holatga oydinlik kiritdi.
Voqea 16-aprel kuni Toshkent shahar Nukus yo‘lida sodir bo‘lgan. Husnora Shodiyeva boshqaruvida bo‘lgan Equinox avtomobili yo‘lning 3 va 4-qatorini yopib qo‘yib, sun’iy tirbandlik hosil qilgan. Bu esa 4-qatordan harakatlanishi kerak bo‘lgan boshqa haydovchilarning noroziligiga sabab bo‘lgan.
Xizmat olib borayotgan YPX xodimi unga tushuntirish berib, oldinga harakatlanishni so‘ragan.
“Musiqasi baland holda mashina ichida raqsga tushib o‘tirgan ekan. Men ishora berganimdan so‘ng e’tibor berib, qaradi. Men musiqangizni pasaytiring, eshitmayapsiz meni, yursangiz-chi, dedim. Oramizdagi masofa uzoq bo‘lgani uchun men baland gapirishga majbur bo‘ldim. Shu orada svetofor yashil yonib, transport vositalari qo‘zg‘alib, uning transport vositasi ham qo‘zg‘alib ketdi. Men tomonimdan Equinox haydovchisiga nisbatan hech qanday haqoratli gap ishlatilgani yo‘q. Qonun doirasida xizmat olib bordim”, deydi YPX xodimi.
“Shunchaki o‘z qatorimga o‘tib, yashil chiroq yonishini kutayotgan edim. Shu payt kimdir menga baqirganini eshitib qoldim. Boshimni burganimda u yerda YPX xodimi turib, meni haqoratli so‘zlar bilan so‘kayotgan ekan”, degan edi teleboshlovchi ijtimoiy tarmoqlardagi chiqishida.
Husnora Shodiyeva “YPX xodimi nega uni haqoratlaganini va uning ismini bilish maqsadida orqaga burilib qaytganida xodim ketib qolganini” bildirgandi.
Hozirda mazkur holat yuzasidan tekshiruv harakatlari o‘tkazilmoqda.
Izoh (0)