Xorazmda pulini ko‘paytirib berishni aytib, mingdan ortiq odamni chuv tushirgan shaxs ushlandi
Xorazm viloyatida soxta treyder qo‘lga olindi. Bu haqda “Hudud” informatsion dasturida xabar berildi.
Ma’lum qilinishicha, qo‘lga olingan shaxs pulini qisqa fursatda ko‘paytirib berishini aytib, ijtimoiy tarmoqlar orqali mingdan ortiq odamni aldagan.
Bundan bir necha kun oldin bitta Telegram kanalga a’zo qilib qo‘yishdi. Treyding orqali pulni bir baravarga ko‘paytirib berish haqida ma’lumotlar bor edi. Ko‘paytirib olish maqsadida 20 million so‘m pulimni tashlab berdim. Oradan 1 soatcha o‘tganidan keyin bloklab qo‘yishdi, degan jabrlanuvchilardan biri.
IIV Kiberxavfsizlik markazi yetakchi mutaxassisi Maqsudjon Mirabdullayevning bildirishicha, mingdan ortiq fuqaroni aldab, soxta treyderlik faoliyati bilan shug‘ullanib kelgan shaxs IIV tezkor-qidiruv departamenti Kiberxavfsizlik markazining hududiy bo‘linmalari tomonidan qo‘lga olindi.
Xorazm viloyatida ushlangan ushbu shaxs yashash manzili ko‘zdan kechirilganda 10 dan ortiq planshet, 96 ta mobil telefon, 1171 dona bank kartasi hamda 343 ta SIM-karta topilgan.
Hozirda holat bo‘yicha surishtiruv ishlari olib borilmoqda.
Qo‘lga tushayotgan soxta treyderlar
2024-yilning oktyabr oyida Toshkentda o‘zini treyder deb tanishtirib, o‘zganing 7 million so‘mini o‘zlashtirgan shaxs ushlangandi. Shuningdek, Namanganda treyderlik bilan shug‘ullanishi aytib, o‘zganing 22 million so‘mini o‘zlashtirgan shaxs ushlangani haqida xabar berilgandi. Bundan tashqari, Qashqadaryoda o‘zganing pulini aldov yo‘li bilan o‘zlashtirgan “treyder” ushlangan edi.
