O‘zbekistonda 2025-yil 31-iyulgacha transport vositasini jarima maydonchasidan olib chiqish uchun YIDXP, Davlat xizmatlari markazlari yoki YHXXning mobil ilovasi orqali elektron ruxsatnoma olish xizmatini yo‘lga qo‘yish rejalashtirilmoqda.
Muhokama uchun e’lon qilingan hukumat qarori loyihasiga ko‘ra, hozirgi kunda avtomototransport vositalarini jarima maydonchasidan olib chiqish uchun fuqarolar tomonidan murojaatlar an’anaviy tarzda amalga oshirilib kelinayotgani aholining ortiqcha ovoragarchiligiga sabab bo‘lmoqda. Shu sababli avtomototransport vositalarini jarima maydonchasidan olib chiqish holati yuzasidan YHXXga Yagona interaktiv davlat xizmatlari portali orqali elektron murojaat qilish zarurati yuzaga kelmoqda.
Prezidentining 2025-yil 30-apreldagi “Ichki ishlar organlari tizimini raqamli transformatsiya qilish bo‘yicha kompleks chora-tadbirlar to‘g‘risida”gi qarorida avtotransport vositasini jarima maydonchasidan chiqarish davlat xizmatini elektron shaklga o‘tkazish belgilangandi.
Avtomototransport vositalarni jarima maydonidan olib chiqish uchun vakolatli davlat organi tomonidan QR-kod (matrik shtrixli kod) bilan tasdiqlangan elektron hujjat taqdim etiladi. Davlat xizmatini ko‘rsatganlik uchun to‘lov undirilmaydi.
Jarima maydonlariga joylashtirilgan transport vositalarini chiqarish uchun elektron ruxsatnomalar ushbu transport vositalarni ushlab turish sababi bartaraf etilgunga va ma’muriy huquqbuzarlik to‘g‘risidagi ish ko‘rib chiqilgunga qadar berilmaydi. Transport vositalarini jarima maydonchasidan olib chiqish uchun YHXXga og‘zaki yoki yozma murojaat qilish imkoniyati ham saqlab qolinadi.
Izoh (0)