Qizib ketgan gadjetni qayta ishga tushirish va unga zarar yetkazmaslikning sinovdan o‘tgan usullari bilan tanishing.
1. G‘ilofni yeching
Qo‘shimcha plastik yoki silikon issiqlikni chiqarib yuborishni qiyinlashtiradi, shuning uchun aksessuarni vaqtincha olib qo‘yib, telefonga biroz ehtiyotkorroq bo‘lgan ma’qul.
2. Ventilyatordan foydalaning
Qurilmani quyoshdan olib, ventilyator yaqinidagi tekis, salqin yoki hech bo‘lmaganda qizimagan yuzaga qo‘ying. Agar yelpig‘ich bo‘lsa, undan ham foydalanish mumkin.
Telefonni muzlatkichga solish yoki unga muzlatilgan chuchvara qo‘yish tavsiya etilmaydi: haroratning keskin o‘zgarishi faqat zarar keltirishi mumkin.
3. Telefonni o‘chiring
Hatto issiqda uzoq vaqt davomida video yozish tufayli qurilma qizib ketganini bilsangiz ham, uni bir necha daqiqaga butunlay o‘chirib qo‘yish shunchaki suratga olishni to‘xtatishdan ko‘ra samaraliroq bo‘ladi. Korpus yetarlicha sovigandan so‘ng qayta yoqishingiz mumkin.
4. Quvvat tejash rejimini yoqing
Ushbu rejimning aniq ishlash mexanizmi ishlab chiqaruvchiga bog‘liq. Odatda fonda ilovalarning yuklanishi cheklanadi, animatsiyalar soddalashtiriladi va ekran yangilanish tezligi pasaytiriladi. Bularning barchasi qurilmaning issiqqa osonroq bardosh berishiga yordam beradi.
5. Parvoz rejimini yoqing
Parvoz rejimi (avia rejim) simsiz aloqani o‘chiradi: mobil tarmoq, Wi-Fi, GPS, Bluetooth. Natijada smartfon doimiy ravishda uyali aloqa minorasi, Wi-Fi ulanish nuqtasi yoki ulanish mumkin bo‘lgan qurilmalarni qidirishni to‘xtatadi.
Parvoz rejimida Wi-Fi va Bluetooth aloqasini zarur bo‘lganda qo‘lda faollashtirish mumkin, biroq boshqa xizmatlar o‘chirilgan holda qoladi. iOS parvoz rejimida Bluetooth butunlay o‘chirilmaydi, ammo agar ulangan soat yoki quloqchinlardan foydalanmayotgan bo‘lsangiz, bu funksiyani qo‘lda o‘chirib qo‘yishingiz mumkin.
6. Taglikdan foydalaning
Smartfoni xonada qizib ketadigan kishilar uchun yechim. Asosiysi, qurilmaning orqa paneliga minimal darajada tegib turadigan aksessuarni tanlash. Agar smartfon korpusi havo oqimlari bilan shamollatilsa, undan issiqlikni chiqarish osonroq bo‘ladi.
7. Qizib ketish sababini aniqlang
Agar smartfoningiz asossiz qizib ketayotgandek tuyulsa, sozlamalar orqali ko‘p quvvat sarflaydigan ilovani topishga harakat qiling. Odatda qizib ketish va batareya tez tugashi bir-biriga bog‘liq, shuning uchun iPhone’da “Batareya” bo‘limiga va Android’da “Batareyalar” yoki “Foydalanish vaqti” kabi bo‘limlarga e’tibor bering.
Agar quvvat sarfi bo‘yicha birinchi o‘rinlarda siz deyarli yoki umuman foydalanmaydigan biror narsa bo‘lsa, bu xavotirli belgi hisoblanadi.
Shubhali ilovani yuklab olganingiz yoki unga orqa fonda ma’lumotlarga haddan tashqari ko‘p ruxsat berganingiz xavfi mavjud. Bu issiqlik bilan birgalikda qurilmaning qizib ketishiga olib kelgan bo‘lishi mumkin. Bunday dasturlarni o‘chirib tashlash yoki hech bo‘lmaganda ularning geolokatsiya kabi xizmatlarga ulanishini cheklash maqsadga muvofiq.
Izoh (0)