O‘zbekistonda 2024-yilning birinchi yarmida jinoyat ishlari bo‘yicha sudlar tomonidan 342 ming 109 nafar shaxsga nisbatan 285 ming 651 ta maʼmuriy huquqbuzarlik to‘g‘risidagi ish ko‘rib chiqildi. Bu haqda Oliy sud matbuot xizmati xabar berdi.
Qayd etilishicha, yanvar—iyun oylari davomida 222 ming 101 nafar shaxsga nisbatan maʼmuriy jazolar qo‘llanilgan. Yarashuv munosabati bilan 39 ming 935 nafar shaxs maʼmuriy javobgarlikdan ozod etilgan.
Ko‘rilgan maʼmuriy huquqbuzarlik to‘g‘risidagi ishlarning aksariyatini mayda bezorilik, avtomobil transportida yo‘lovchilar tashish faoliyati bilan litsenziyasiz shug‘ullanish, ichki ishlar organlari xodimining qonuniy talablarini bajarmaslik, haqorat qilish, transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi, elektr, issiqlik energiyasi, gazdan foydalanish qoidalarini buzish, savdo yoki xizmat ko‘rsatish qoidalarini buzish, jamoat joylarida alkogol mahsulotini isteʼmol qilish va yong‘in xavfsizligi qoidalarini buzish bilan bog‘liq maʼmuriy huquqbuzarliklar tashkil etgan.
Transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi bilan bog‘liq maʼmuriy huquqbuzarlik bo‘yicha 18 ming 403 nafar shaxsga nisbatan 17 ming 982 ta ish ko‘rib tamomlangan. Shundan 11 ming 568 nafar shaxsga nisbatan jarima va transport vositasini boshqarish huquqidan mahrum etish kabi maʼmuriy jazolar qo‘llanilgan.
Shu bilan birga transport vositalarini mast holda boshqarish hamda transport vositalari haydovchilarining va yo‘l harakati boshqa ishtirokchilarining mastligi yoki mast emasligini aniqlash uchun tekshiruvdan o‘tishdan bo‘yin tovlashi bilan bog‘liq maʼmuriy huquqbuzarliklar bo‘yicha 14 ming 556 nafar shaxsga nisbatan 14 ming 427 ta ish ko‘rib tamomlangan. Shundan 12 ming 867 nafar shaxsga nisbatan jarima, transport vositasini boshqarish huquqidan mahrum etish va maʼmuriy qamoqqa olish kabi maʼmuriy jazolar qo‘llanilgan.
Oliy sudning Jinoyat ishlari bo‘yicha sudlov hayʼati tomonidan taftish tartibida 935 nafar shaxsga nisbatan 852 ta maʼmuriy huquqbuzarlik to‘g‘risidagi ish ko‘rib chiqildi. 187 nafar shaxsga nisbatan quyi sudlar tomonidan chiqarilgan qarorlar bekor qilinib, 226 nafar shaxsga nisbatan chiqarilgan sud qarorlari o‘zgartirilgan.
Avvalroq Toshkentda “prava”si bo‘lmagan shaxs boshqaruvidagi avtomashina ishtirokida YTH sodir bo‘lgani to‘g‘risida xabar berilgandi.
Izoh (0)