Dubayning Emirates aviakompaniyasi buklanadigan yostiqli yangi U‑Dream bosh suyanchig‘ini namoyish qildi. U ekonom klass uchun mo‘ljallangan bo‘lib, yo‘lovchilarga “parvoz vaqtida mutlaqo yangicha qulaylik”ni taqdim etishni maqsad qilgan.
Yumshoq qoplamali U-simon konstruksiya uyqu paytida bosh va bo‘yinni tutib turadi. Yon “qanotlar”ni o‘z bo‘yi va gavdasiga moslab yuqoriga-pastga harakatlantirish hamda biroz egish mumkin.
Bo‘yin yostiqlariga endi hojat yo‘q, deydi Emirates kompaniyasi prezidenti Tim Klark.
Ishlab chiquvchilarning so‘zlariga ko‘ra, U-Dream qulay holatni saqlashga, oldinga yoki yon tomonga egilib qolmaslikka yordam beradi. Model mustaqil sinovlardan o‘tgan va Yevropa aviatsiya xavfsizligi agentligi (EASA) standartlariga mos keladi.
Yangi bosh suyanchiqlar allaqachon uchta Airbus A350 samolyotiga o‘rnatilgan. Emirates butun aviaparkini ular bilan imkon qadar tezroq jihozlamoqchi va bu ishni yil oxirigacha yakunlashga va’da bermoqda.
Yaqinda Air New Zealand ham uzoq parvozlar uchun o‘z yechimini — ikki yarusli karavotlarga ega Skynest kapsulalarini taqdim etdi. Ular ko‘pi bilan to‘rt soatga mo‘ljallangan qo‘shimcha opsiya sifatida sotiladi, shuning uchun butun reys uchun to‘laqonli yotoq o‘rnini xarid qilib bo‘lmaydi.
