Bugungi maqolamizda uzoq tanaffusdan so‘ng yorqin kambek qilgan Janubiy Koreyaning mashhur aktyor va aktrisalari haqida so‘z yuritamiz. Ularning har biri nafaqat qiyinchiliklarni yengib o‘tdi, balki o‘zining eng muvaffaqiyatli rollaridan ayrimlarini aynan qaytganidan keyin ijro etishga muvaffaq bo‘ldi.
Kon Yu
Kon Yu o‘z faoliyatini 2000-yilda televideniyeda boshlovchilikdan boshlagan. U 2001-yildayoq “Maktab 4” doramasida aktyor sifatida debyut qildi. Bir nechta ikkinchi darajali rollardan so‘ng “Mening sevimli o‘qituvchim” doramasi va “Niqob ostida” filmidagi bosh rollar bilan tanildi. 2007-yilda Kon Yu “Shahzoda” seriali bilan birgalikda chinakam shov-shuv ko‘tardi. Mehr va qahva iforiga yo‘g‘rilgan romantik komediyaning shuhrati bir kechada aktyorni “Koreys to‘lqini”ning eng yorqin yulduzlaridan biriga aylantirdi. Biroq kichik ekranlardagi bu shov-shuvli muvaffaqiyatdan so‘ng tanaffus yuz berdi.
2011-yilda Kon Yu “Og‘ir sinov” nomli o‘tkir ijtimoiy dramada maxsus maktabda zo‘ravonlikka uchrayotgan kar bolalarga yordam berishga urinadigan o‘qituvchi Kan In Xo rolini mahorat bilan ijro etdi. Uning “Katta” doramasidagi keyingi ishi esa garchi qiziqarli konsepsiyasi Kon Yudan 30 yoshli erkak tanasida yashayotgan o‘spirin obraziga kirishni talab qilgan bo‘lsa-da, 2012-yilda deyarli e’tibordan chetda qoldi. Shundan so‘ng aktyor yana naq to‘rt yilga teleekranlardan g‘oyib bo‘ldi.
Kon Yu ishtirokidagi yangi dorama faqat 2016-yilda, uning “Pusanga ketayotgan poyezd” filmidan so‘ng ekran yuzini ko‘rdi va bu asar aktyorni haqiqiy afsonaga aylantirdi, chunki bu “Tokkebi” edi. Necha asrlardan beri o‘zini la’natdan xalos qila oladigan kelinini izlab yurgan o‘lmas tokkebi hikoyasi Janubiy Koreyada madaniy hodisaga aylanib, butun dunyoda katta e’tirofga sazovor bo‘ldi. Kim Shin ismli tokkebi roli Kon Yu uchun aktyorlik faoliyatidagi eng yorqin rol bo‘ldi. Oradan o‘n yil o‘tgan bo‘lsa-da, “Tokkebi” hamon tildan tushmagan, doramadagi mashhur joylar esa odamlar uchun diqqatga sazovor maskan bo‘lib qolmoqda.
Li Yon E
Li Yon E o‘zining aktrisalik faoliyatini 1993-yildayoq boshlagan, biroq sezilarli muvaffaqiyatga erishish uchun naq yetti yil kutishiga to‘g‘ri keldi. Bu yutuq 2000-yilda, aktrisa rejissyor Pak Chxan Ukning “Birlashgan xavfsizlik hududi” nomli mashhur dramasida bosh rollardan birini qo‘lga kiritganida yuz berdi. Shundan so‘ng atigi besh yil ichida Li Yon E Koreyaning eng mashhur aktrisalaridan biriga aylandi. “Saroy javohiri” tarixiy doramasidagi roli unga ulkan shuhrat keltirdi. Uning qahramoni So Jan Gim qirollik oshxonasidagi oshpazlikdan Chosonning birinchi ayol tabibi darajasigacha bo‘lgan yo‘lni bosib o‘tdi va buni millionlab tomoshabinlar diqqat bilan kuzatib bordi. Li Yon Eni katta ekranlarda “Bahorning bir kuni” melodramasida va Pak Chxan Ukning “Mening qasoskor malikam” nomli yangi filmida ko‘rish mumkin edi.
2009-yilda Li Yon E koreys-amerikalik tadbirkorga turmushga chiqadi va 2011-yilda ularning egizak farzandlari dunyoga keladi. Aktrisa deyarli butun vaqtini oilasi va farzandlari tarbiyasiga bag‘ishlashga qaror qiladi. U faqat 2017-yilda, oradan 12 yil o‘tib, “Saimdan: nur kundaligi” nomli tarixiy doramada ilk bor ekranlarda ko‘rinish beradi. Unda aktrisa bir yo‘la ikki rolni: zamonaviy san’atshunos So Ji Yun hamda Choson davrining mashhur rassomi Sim Saimdanni gavdalantiradi. Dorama turlicha kutib olingan bo‘lsa-da, Li Yon Ening aktyorlik mahorati tomoshabinlar va tanqidchilar tomonidan yuqori baholandi. Shunga qaramay, aktrisaning kinoga to‘laqonli qaytishini yana to‘rt yil kutishga to‘g‘ri keldi.
2021-yilda Li Yon E ishtirokida “Inspektor Ku” nomli detektiv premyerasi bo‘lib o‘tdi. Unda aktrisa g‘ayrioddiy seriyali qotilning iziga tushgan sobiq politsiyachi rolini ijro etdi. 2023-yilda esa “Maestro” doramasida muammoli orkestrni boshqarib, kutilmagan voqealar girdobiga tushib qolgan dirijyor Chxa Se In rolini o‘ynadi. Li Yon E erining to‘satdan kasal bo‘lib qolishi sababli taqiqlangan moddalar savdosi orqali tezda pul ishlashga qaror qilgan va bu qarori xavfli oqibatlarga olib kelgan uy bekasi Kan In Su rolini o‘ynadi.
Li Byon Xon
Mashhur aktyor Li Byon Hon 1991-yilda debyut qilgan bo‘lsa, 1994-yilda “Politsiya” detektiv doramasida bosh rollardan birini ijro etadi. Biroq Li Byon Honning aktyorlik faoliyatidagi chinakam yutuqqa hali ancha vaqt bor edi. Rejissyor Pak Chan Ukning “Birlashgan xavfsizlik hududi” filmi ana shunday yutuq bo‘ldi va unda aktyor aktrisa Li Yon E bilan birga rol o‘ynadi. Janubiy koreyalik serjant Li Su Hyok roli Li Byon Honga katta shuhrat va tanqidchilar e’tirofini olib keldi. 2003-yilda aktyor aktrisa Son He Gyo bilan birga mashhur “Va-bank” koreys doramasida suratga tushdi va shu bilan birga to‘liq metrajli filmlarda ham faol ishlashni davom ettirdi. Kichik ekranlardagi navbatdagi katta muvaffaqiyat aktyorga 2009-yilda “Ayris” josuslik doramasi bilan nasib etdi. Unda Li Byon Hon Koreya razvedkasi agenti Kim Hyon Jun rolini gavdalantirdi. Do‘stlik qarama-qarshilikka aylanib, muhabbat burch bilan to‘qnash keladigan ushbu hayajonli hikoya tanqidchilar tomonidan yuksak baholandi. Dorama finaliga kelib tomoshabinlar reytingi 40 foizga yetdi.
Ammo “Ayris”dan so‘ng Li Byon Xon naq 9 yil davomida butunlay katta kinoga sho‘ng‘idi. U televizion ekranlarga faqat 2018-yilda qaytdi va uning navbatdagi muvaffaqiyatli ishi “Janob Quyosh nuri” tarixiy dramasi bo‘ldi. Aktyorning faoliyati yana maqolamiz qahramonlari hayoti bilan chambarchas bog‘lanib ketdi. Aynan u aktrisa Kim Txe Rining partnyoriga aylanib, koreys millatiga mansub AQSh armiyasi ofitseri Yujin Chxve rolini ijro etdi. Li Byon Xonning aktyorlik mahorati tomoshabinlar va tanqidchilar tomonidan olqishlarga sazovor bo‘ldi va u o‘zining iqtidorli professional sifatidagi maqomini yana bir bor tasdiqladi. 2022-yilda aktyor “Bizning blyuz” doramasida bosh rollardan birini o‘ynadi va bu serial orqali aktyor Kim U Bin ham kasallikdan so‘ng kichik ekranlarga qaytdi. Bu safar Li Byon Xon o‘tmishida og‘ir oilaviy fojiani boshdan kechirgan, odamovi savdogar Li Don Sok rolini ijro etdi.
Kim Bom
Koreyaning eng xarizmatik va jozibador aktyorlaridan biri Kim Bom ilk bor 2006-yili “Zarba!” komedik doramasida ekranlarda ko‘rinish bergan. Oradan uch yil o‘tib, u “Gullardan-da go‘zal yigitlar” romantik doramasidagi mashhur “F4” guruhining eng yorqin a’zolaridan biriga aylandi. Biroq “Gullardan-da go‘zal yigitlar”ning muvaffaqiyatidan keyin Kim Bom turli dorama va filmlarda faol ishtirok etishda davom etdi, jumladan, “Bu qishda shamol esmoqda” melodramasida ham esda qolarli rol o‘ynadi. Shunday bo‘lsa-da, shov-shuvli va mashhur loyihalar go‘yo uni chetlab o‘tayotgandek edi. 2010-yili aktyor o‘zining sobiq agentligi bilan sudlashishga majbur bo‘ldi, ikki yildan so‘ng esa unga tizza bo‘g‘imlari artriti tashxisi qo‘yildi. 2018-yildan 2020-yilgacha aktyor davlat xizmatchisi sifatida muqobil harbiy xizmatni o‘tadi. Bu aktyor hayotidagi eng murakkab bosqich bo‘ldi.
Aynan harbiy xizmatni yakunlaganidan so‘ng Kim Bomning karyerasida yangi, muvaffaqiyatli bosqich boshlandi. Aktyorning ishga qaytganidan keyingi ilk loyihasi “To‘qqiz dumli tulki qissasi” nomli fantastik romantik dorama bo‘lib, unda u Li Don Uk va Cho Bo A bilan birga rol ijro etgan. Kim Bom filmda Li Ran ismli kumixo – afsonaviy maxluq qiyofasida namoyon bo‘ldi. Dorama katta muvaffaqiyat qozondi, Kim Bom esa tomoshabinlar qalbini zabt etdi. Keyinroq aktyor doramaning ikkinchi mavsumida Li Ran rolini yana ijro etdi, shuningdek, “Huquq maktabi” yuridik dramasi, “Arvoh doktor” tibbiy fantastikasi va “Bugun hammasi yana sotilib ketdi” romantik komediyasidagi yorqin ishlari bilan ham yodda qoldi.
Kim U Bin
Yoshligida Kim U Bin model bo‘lishni orzu qilgan va 20 yoshidayoq ilk moda namoyishlarida qatnasha boshlagan. Ko‘p o‘tmay, u reklama bo‘yicha takliflar ola boshlagan. Kim U Bin aktyor sifatida 2011-yilda “Oq Rojdestvo” doramasida debyut qilgan. Aktyorga ilk katta shuhratni “Maktab 2013” doramasidagi roli olib keldi. Ammo Kim U binning chinakam yulduzli onlari mashhur “Vorislar” doramasi hamda yirik kompaniya merosxo‘ri va mashhur sevgi uchburchagi ishtirokchisi Chhve Yon Do roli bilan boshlandi.
2016-yilda “Beparvo oshiqlar” doramasi efir yuzini ko‘rdi. Unda Kim U Bin o‘limga olib keladigan kasallik bilan kurashib, haqiqiy muhabbatini uchratgan taniqli xonanda va aktyor Shin Jun Yon rolini ijro etadi. Fojiali tasodif tufayli aynan shu roldan so‘ng 2017-yilda aktyorda burun-halqum saratoni aniqlanadi va bu uni aktyorlik faoliyatini butunlay to‘xtatib, davolanishni boshlashga majbur qiladi. “Beparvo oshiqlar” yakunidan farqli o‘laroq, haqiqiy hayotda hammasi ancha ijobiy yakunlandi. Aktyor kasallikni yengib, normal hayotga va ishiga qayta oldi. Sakkiz yillik tanaffusdan so‘ng, 2022-yilda Kim U Bin “Bizning blyuz” doramasi bilan ekranlarga qaytdi. Bu dorama kundalik hayot haqidagi eng yaxshi koreys dramalaridan biri bo‘lib, Kim U Binning aktyorlik faoliyatidagi yangi bosqich uchun ajoyib tramplinga aylandi.
