O‘zbekistonning AQSHdagi elchisi Furqat Siddiqovning ma’lum qilishicha, 2026-yilgi FIFA Jahon chempionati davomida Google'da O‘zbekiston bo‘yicha qidiruvlar soni 450 foizga oshgan.
Elchi bu haqda X (sobiq Twitter) ijtimoiy tarmog‘idagi sahifasida ma’lum qildi. Uning yozishicha, qidiruvlar sonining keskin ortishi O‘zbekiston terma jamoasining tarixda ilk bor FIFA Jahon chempionatining final bosqichida ishtirok etgani bilan bog‘liq. Turnir davomida xorijlik internet foydalanuvchilari O‘zbekiston, uning futboli, milliy terma jamoasi va futbolchilari haqida faol ma’lumot izlagan.
2026-yilgi mundial O‘zbekiston futboli tarixida muhim voqea bo‘ldi. Terma jamoa ilk marta Jahon chempionati final bosqichiga yo‘llanma olib, dunyo futbol jamoatchiligi e’tiborini tortdi. Natijada mamlakat nomiga bo‘lgan qiziqish ham sezilarli darajada oshdi.
