Qozog‘iston prezidenti Qosim-Jo‘mart To‘qayev Moskvada bo‘lib o‘tadigan G‘alaba kuni tantanalarida ishtirok etadi. Bu haqda prezident maslahatchisi va matbuot kotibi Aybek Smadiyarovga tayanib, Tengrinews xabar berdi.
Uning ta’kidlashicha, To‘qayev Moskvada buyuk g‘alabaning 81 yilligiga bag‘ishlangan xotira tadbirlarida qatnashadi.
“Kreml Qozog‘iston rahbarining qaroridan mamnunligini bildirib, uning Moskvaga bo‘lajak amaliy tashrifini ‘do‘stona qadam’ deb atadi. Tashrif doirasida Qosim-Jo‘mart To‘qayev va Vladimir Putinning alohida uchrashuvi rejalashtirilgan”, deyiladi Smadiyarovning bayonotida.
Davlat rahbarlari Rossiya prezidentining may oyi oxiriga rejalashtirilgan Qozog‘istonga tashrifi oldidan strategik hamkorlikning asosiy masalalarini muhokama qiladi.
7-may kuni Kreml paradga boradiganlar ro‘yxatini e’lon qildi. Ammo ular orasida Markaziy Osiyo prezidentlari ko‘rsatilmagandi.
O‘zbekiston prezidenti Shavkat Mirziyoyev 8-may kuni amaliy tashrif bilan Moskva shahriga joʻnab ketdi. Davlat rahbari Ikkinchi jahon urushidagi gʻalabaning 81 yilligiga bagʻishlangan tantanali tadbirlarda ishtirok etadi.
