Idish yuvishda ishlatiladigan kimyoviy vositalar, masalan, gel, yuvish kukunlari va dezinfeksiyalovchi moddalar sog‘liq uchun turli zarar keltirishi mumkin. Ularni to‘g‘ri ishlatmaslik yoki ko‘p miqdorda qo‘llash bir qancha muammolarga olib keladi. Kimyoviy vositalar o‘rniga xonadoningizda mavjud boshqa vositalardan foydalanishingiz ham mumkin.
Iste’mol sodasi
Avvallari zamonaviy idish yuvish vositalari bo‘lmagan vaqtlarda uy bekalari iste’mol sodasidan foydalangan. Soda bilan yuvilgan chinni idishlar yaxshi oqaradi.
Teflon qoplamali idishni yuvishda ehtiyot bo‘ling — soda teflon yuzasini tirnashi mumkin.
Xantal
Quruq xantal idishlarni tozalashda samarali vositadir. Uni turli usulda qo‘llash mumkin. Masalan: bir-ikki choy qoshiq kukunni iliq suvda eritib, idishlarni shu suvda bir necha daqiqaga qoldiring va oddiy suvda yuvib tashlang. Idishlarni xantal bilan yuvishda rezina qo‘lqop kiyishni unutmang, chunki xantal kukuni terini kuydirib yuborishi mumkin.
Kir sovun
Viruslarga qarshi kuchli antibakterial xususiyatlarga ega xavfsiz va toza mahsulot bo‘lgan kir sovun har bir xonadonda topiladi. Uning tarkibidagi ishqor idish-tovoqlarni nafaqat yaxshi tozalaydi, balki dezinfeksiya ham qiladi.
Faqatgina jigarrang kir sovunda idishlarni yuvish mumkin, hozirgi zamonaviy oq sovunlar idish yuvish uchun mo‘ljallanmagan.
Sirka
Olma sirkasi yog‘ni qisqa vaqtda tozalaydi, idishlarni oqartiradi, tovadagi qotib qolgan yog‘lardan xalos etadi va mikroblarni yo‘q qiladi. Sirka hech qanday maxsus tayyorgarlikni talab qilmaydi. Gubkani sirka bilan namlang va yuvishni boshlayvering, so‘ng tozalangan idishlarni quruq sochiq bilan artib oling. Sirkadan so‘ng qoladigan o‘tkir hiddan tashvishlanmang — hid bir necha soat ichida “uchib ketadi”.
Limon kislotasi
Limon sharbati yoki limon kislotasi suv quvuri, kir yuvish mashinasi va choynak ichidagi qotishmalardan xalos bo‘lishda foydali vosita hisoblanadi. Limon kislotasini suvda eriting va shu aralashma bilan idishlarni yuvib olishingiz mumkin. Limon kislotasiga bir necha tomchi sirka qo‘shish ham mumkin. Keyin ularni toza suvda chayib olish kifoya.
Osh tuzi
Tuz qotib qolgan yog‘ni tozalashda keng qo‘llaniladi. Keramika va chinni idishlarni yuvish uchun ularga tuz sepib, ozgina iliq suv qo‘shing va bir necha daqiqaga qoldiring. So‘ng iliq suvda chaying.
