Qirollik hayoti ko‘pincha ertaklardagi kabi go‘zal tarzda tasvirlanadi: hashamatli saroylar, oltin tojlar va tantanali marosimlar barchaning havasini keltiradi. Ammo tarix shuni ko‘rsatadiki, bunday dabdaba ortida ko‘pincha baxt emas, balki majburiyat, bosim va oilaviy fojialar yashiringan bo‘ladi. Ko‘plab qirollik nikohlari muhabbat asosida emas, balki siyosiy kelishuvlar va an’analar talabi bilan quriladi. Oqibatda butun dunyo havas qilgan bu ittifoqlar ko‘pincha xiyonat, yolg‘izlik va ajrim bilan yakunlanadi. Quyida tarixda eng baxtsiz va murakkab kechgan qirollik oilalari haqida hikoya qilamiz.
Malika Margaret va Entoni Armstrong-Jons
Qirolicha Yelizaveta II ning singlisi — malika Margaret nafaqat qirollik xonadoni vakili, balki o‘z davrining eng go‘zal va mard ayollaridan biri edi. U saroy qoidalariga bo‘ysunishni yoqtirmas, hissiyotlarini yashirishni bilmasdi. Aynan shu fe’l-atvori uni o‘zidan 16 yosh katta, ajrashgan harbiy ofitser Piter Taunsendga oshiq bo‘lishga olib keldi. Bu sevgi butun Londonni larzaga soldi va bu ittifoq har qanday to‘siqlardan kuchli bo‘lgan muhabbat haqidagi go‘zal hikoyaga aylanishi mumkin edi.
Ammo ularning munosabatlariga Anglikan cherkovi va Britaniya hukumati aralashdi. Ajrashgan erkak bilan turmush qurish qirollik oilasi uchun mutlaqo maqbul emas edi. Hatto qirolicha Yelizaveta ham singlisiga tanlov qo‘yishga majbur bo‘ldi: yo unvon va moliyaviy ta’minotdan voz kechib, muhabbatni tanlash yoki tojni saqlab qolib, sevganidan ayrilish. Margaret uzoq o‘ylab, qirollikni tanladi. Bu tanlov esa unga butun umrga cho‘zilgan afsusni olib keldi.
1960-yilda u mashhur londonlik fotograf Entoni Armstrong-Jonsga turmushga chiqdi. Bu nikoh monarxiya uchun ijobiy qabul qilindi. Ammo tashqi hashamat ortida mutlaqo boshqa manzara yashirin edi. Entoni yengil hayotni sevuvchi, erkin va o‘z qoidalari bilan yashaydigan inson edi. Margaret esa saroy etiketi, protokol va cheklovlar ichida ulg‘aygan edi. Kechki bazmlar, ichkilik va xiyonatlar bu ittifoqqa darz ketishiga sabab bo‘ldi. Entoni doimiy xiyonat qilib yurdi, Margaret esa sukut ichida azobda qoldi.
1978-yilda bu nikoh ajrim bilan yakunlandi va Britaniya monarxiyasining zamonaviy tarixida ilk rasmiy ajrim sifatida qayd etildi.
Malika Diana va shahzoda Charlz
Shahzoda Charlz va Diana Spenserning munosabatlari avval boshidanoq taqdir tomonidan belgilab qo‘yilgandek edi. Diana sodda, kamtar va samimiy xarakterga ega bo‘lgan aristokrat qiz, Charlz esa an’analar va mas’uliyat yukini yelkasida ko‘targan taxt vorisi edi. 1981-yil iyul oyida bo‘lib o‘tgan ularning to‘yi butun dunyoni ekranlar oldiga mixlab qo‘ydi: 750 milliondan ortiq tomoshabin bu marosimni jonli efirda kuzatdi.
Hammasi mukammaldek edi: muhtasham ko‘ylak, tantanali bayram, hashamat. Faqat muhabbat bu yerda yetishmas edi. Oradan vaqt o‘tib, shahzoda Charlz to‘ydan avval ham Kamilla Parker-Boulzga oshiq bo‘lganini, faqat uni rasmiy ravishda tanlay olmaganini butun dunyo bildi. Diana ikki o‘g‘il — Uilyam va Garrini dunyoga keltirdi, biroq shaxsiy hayotida tobora yolg‘izlanib bordi.
Uning mashhur “bu nikohda biz uch kishi edik” degan so‘zlari qirollik tarixidagi eng achchiq iqrorlardan biri bo‘lib qoldi. 1996-yilda ular ajraldi, 1997-yilda esa Diana fojiali o‘lim topdi. Garchi u “qalblar malikasi” bo‘lishga ulgurgan bo‘lsa-da, unga abadiy baxt va’da qilgan insonning qalbini zabt eta olmadi.
Shahzoda Endryu va Sara Fergyuson
Shahzoda Endryu qirolichaning erkatoy o‘g‘li edi, Sara Fergyuson esa ochiqko‘ngil, quvnoq va hayotga chanqoq qiz edi. Ular 1985-yilda Vindzor qasrida tanishishdi va bu tasodifiy uchrashuv qisqa fursatda ajoyib romantik munosabatlarga aylandi. Ularning to‘yi Vestminster abbatligida katta tantana bilan nishonlandi.
Sara ikki qiz — Beatris va Yevgeniyani dunyoga keltirdi. Ammo nikoh hayotiy sinovlarga dosh bera olmadi. Endryu harbiy xizmat tufayli yiliga atigi bir necha o‘n kunni oilasi bilan o‘tkazar edi. Sara esa yolg‘izlikdan qochib, dunyoviy hayot girdobiga sho‘ng‘idi.
Oradan ma’lum vaqt o‘tib Janubiy Fransiyadagi villada olingan shov-shuvli suratlar tarqaldi, ularda amerikalik tadbirkor Saraning oyoqlarini o‘payotgani aks etgan edi. Qirollik oilasi bunday xatti-harakatni kechirmadi. Oqibatda 1996-yilda Endryu va Sara ajrashdi.
