Rossiyada “Qizaloq va maymoq” (“Маша и медведь”) multfilmini taqiqlash masalasi ko‘tarildi. Ayrim ekspertlar, jumladan, siyosatshunos va jamoat arbobi Vadim Popovning fikricha, ushbu animatsion kartina bolalarda an’anaviy oila qadriyatlarga zid tasavvur uyg‘otishi mumkin.
Popovning aytishicha, mamlakatda teletomoshabinlar hamda striming platformalari foydalanuvchilari “Qizaloq va maymoq” multfilmini bolalarga namoyish etishni cheklash masalasini ko‘rib chiqishlari lozim. Chunki kartina g‘oyaviy mazmunida Rossiya jamiyatida ustuvor sanaladigan an’anaviy oilaviy qadriyatlarga zid jihatlar mavjud. Siyosatshunos fikriga ko‘ra, multfilmda yolg‘iz yashaydigan, ota-ona qaramog‘idan tashqarida ulg‘ayayotgan va hayvon tomonidan tarbiyalanayotgan qizaloq obrazi yosh tomoshabinlarda oilaning o‘rni va oila institutiga oid noto‘g‘ri tasavvurlarni shakllantirishi mumkin.
“Bu multfilm bolalar auditoriyasiga taklif etilishi maqsadga muvofiq emas. Unda vayronkor g‘oyalar va salbiy ijtimoiy xarakterli elementlar mavjud”, deya qayd etdi Popov.
Shuningdek, u bosh qahramon Masha obrazining o‘ta injiq, o‘jar va boshqalar bilan hisoblashmaydigan qiz ekanligiga e’tibor qaratdi. Popovning so‘zlariga ko‘ra, multfilmda barcha hayvonlar Mashadan qo‘rqadi, qizaloq esa o‘z xohish-istagini majburlab o‘tkazadigan personaj sifatida tasvirlanadi. U misol sifatida Mashaning bo‘rilarni zo‘rlab davolanishga undagan epizodini keltirib, bu holat hayvonlarga nisbatan shafqatsizlikni targ‘ib qilayotgani haqidagi xavotirni ifoda etadi.
Popovning mulohazasiga ko‘ra, ayrim ikkilamchi personajlarning xatti-harakati ham savol tug‘diradi. Jumladan, ayol Ayiq obrazi samimiyat bilan e’tibor qaratayotgan erkak Ayiqning his-tuyg‘ularini rad etib, tashqi ko‘rinishi va boyligi bilan ajralib turuvchi boshqa, kuchliroq Ayiqni afzal ko‘rishi yosh tomoshabinlarga, ayniqsa, qiz bolalarga munosabat va qadriyatlar bo‘yicha noto‘g‘ri namuna bo‘ladi.
Shu bilan birga, Popov butun multfilmni hozircha to‘liq taqiqlash zarur emasligini bildirgan. Ammo u “Qizaloq va maymoq”da mazmunan bahsli, g‘oyaviy jihatdan zararli deb baholanishi mumkin bo‘lgan epizodlar yetarli ekanini ta’kidlab, ushbu masala bo‘yicha ekspertlar tomonidan munozaralar davom etishi kerakligini bildirgan.
