Hindiston kino sanoatining qiroli sifatida mashhur bo‘lgan 59 yoshli Shohrux Xon Bollivud tarixidagi birinchi milliarderga aylandi. Bu haqda “Kommersant.ru” Hurun India Rich List 2025 ma’lumotlariga tayanib xabar berdi. Reytingga ko‘ra, Xonning boyligi 1,4 milliard dollarni tashkil etadi. Bu miqdor Arnold Shvarsenegger, Rianna, Teylor Svift va Tayger Vuds kabi jahon yulduzlarining moliyaviy holatiga tenglashadi.
Hurun India tahlilchilari Shohrux Xonning milliarderlar qatoriga kirishini “Hindistondagi iqtisodiy o‘sishning dinamikasi” sifatida baholadi. So‘nggi yillarda mamlakat iqtisodiyotining o‘sishi faqat ishlab chiqarish, IT yoki bank sektori bilan cheklanmay, ko‘ngilochar soha, sport va intellektual mulkka asoslangan bizneslarda ham faol shakllanmoqda.
Hozirda Shohrux Xonning umumiy boyligi qariyb 124,9 milliard rupiy (1,4 mlrd dollar)ga teng. Uning moliyaviy imperiyasi bir nechta yirik aktivlardan iborat:
• Red Chillies Entertainment — Shohrux Xonga tegishli prodyuserlik kompaniyasi. U film ishlab chiqarish, vizual effektlar va raqamli media sohalarida faoliyat yuritadi.
• Knight Rider Sports — Kolkata Knight Riders kriket klubini boshqaruvchi kompaniya bo‘lib, IPL ligasida ishtirok etadi va doimiy daromad manbai hisoblanadi.
• Ko‘chmas mulklar — Bombeydagi mashhur “Mannat” saroyi, Alibaugdagi dengiz bo‘yidagi hashamatli uy hamda xorijdagi bir nechta elita darajadagi ko‘chmas mulklar.
• Reklama shartnomalari — Hyundai, LG, Dubai Tourism va boshqa global brendlar bilan hamkorlik qiladi.
• Investitsiyalar — media startaplar, raqamli kontent platformalari va xalqaro loyihalarga kiritilgan sarmoyalar.
