Joriy yildan boshlab Turkmaniston o‘quvchilari o‘tish imtihonlarini topshirmaydi. Bunday qaror 12 yillik o‘rta ta’lim konsepsiyasidan kelib chiqqan holda qabul qilindi. Bu haqda Turkmen.news xabar bermoqda.
Ma’lum qilinishicha, imtihonlarning bekor qilinishi o‘qituvchilar, ota-onalar va o‘quvchilarning o‘zlari tomonidan mamnuniyat bilan kutib olingan.
Shu paytgacha turkman umumta’lim maktablari o‘quvchilari to‘rtinchi sinfdan boshlab imtihon topshirar edilar: beshinchi sinfga o‘tishda, so‘ng oltinchi sinfga va hokazo, o‘ninchi sinfgacha davom etardi. 11-sinfda bitiruv imtihonlari o‘tkaziladi. Har yili ingliz tili va informatika fanlaridan imtihon topshirilgan. 12 yillik ta’limga o‘tish butun tizim konsepsiyasini qayta ko‘rib chiqishni taqozo etdi va shu o‘quv yilidan boshlab sinfdan sinfga o‘tishda imtihonlar o‘tkazmaslikka qaror qilingan.
Turkmanistonda maktab ta’limi uch bosqichga bo‘linadi: 1-bosqich — 1—4-sinflar boshlang‘ich ta’lim; 2-bosqich — 5—10-sinflar o‘rta ta’lim; 3-bosqich — 11—12-sinflar yuqori ta’lim.
Bundan buyon faqat 5-sinfga (matematika va turkman tili) va 10-sinfga (geografiya va hayot faoliyati asoslari) o‘tishda imtihonlar saqlanib qoladi. 12-sinfda bitiruvchilar davlat imtihonlarini topshiradilar.
