Shavkat Mirziyoyev Qozog‘iston prezidenti Qosim-Jo‘mart To‘qayevning taklifiga binoan 29-mart kuni oliy darajadagi norasmiy uchrashuv o‘tkazish uchun amaliy tashrif bilan Olmaota shahrida bo‘ladi.
Prezident matbuot xizmatining xabar qilishicha, ikki mamlakat delegatsiyalari ishtirokida O‘zbekiston—Qozog‘iston yaxshi qo‘shnichilik, strategik sheriklik va ittifoqchilik munosabatlarini izchil mustahkamlash masalalari hamda xalqaro va mintaqaviy ahamiyatga molik dolzarb masalalar ko‘rib chiqiladi.
Savdo, sanoat kooperatsiyasi, transport va logistika, energetika, qishloq va suv xo‘jaligi sohalarida amaliy hamkorlikni kengaytirish hamda faol hududlararo aloqalar va madaniy-gumanitar almashinuvni davom ettirish e’tibor markazida bo‘ladi.
2024-yilning aprel oyi boshida O‘zbekiston va Qozog‘iston yetakchilarining shunday ikki tomonlama uchrashuvi Xiva shahrida bo‘lib o‘tgan edi.
Qosim-Jo‘mart To‘qayev Urganch xalqaro aeroportida milliy qo‘shiq va raqslar bilan tantanali kutib olingandi. Tashrif davomida ikki davlat yetakchilari muzokaralar o‘tkazib, qadimgi Xiva shahrining tarixiy obidalarini ziyorat qilgandi.
Izoh (0)