O‘zbekistonga shanba va yakshanba kunlari respublikaning g‘arbiy hududlariga nam va nisbatan salqin havo massalari kirib kelishi boshlanadi, deb xabar bermoqda “O‘zgidromet”.
Ma’lum qilinishicha, 22-23 mart kunlari Qoraqalpog‘iston Respublikasi, Xorazm, Buxoro, Navoiy viloyatlarida ba’zi joylarda yomg‘ir yog‘adi. Ayrim tog‘li hududlarda ham yomg‘ir yog‘adi, baland tog‘larda qorga aylanadi.
Respublikaning qolgan hududlarida quruq ob-havo bo‘lishi kutilmoqda. Ushbu kunlarda havo harorati asta-sekin pasayadi va 22-27 daraja iliqni tashkil etadi.
Sharqiy shamol yo‘nalishini o‘zgartirib, g‘arbdan 7-12 metr/sekund tezlikda esadi, ba’zi joylarda 13-18 metr/sekundgacha kuchayadi.
Toshkentda dam olish kunlari yog‘ingarchilik kutilmaydi. Harorat asosan kechalari 12-14 daraja iliq, kunduz kunlari 26-28 daraja iliq bo‘ladi.
Navro‘z bayrami qulay ob-havo sharoitida o‘tadi, faqat respublika shimolida ba’zi joylarda yomg‘ir yog‘adi. 21—25-mart kunlari kutilayotgan yog‘ingarchilik hamda havo haroratining o‘zgarishi sabab Qashqadaryo, Surxondaryo, Samarqand, Jizzax, Toshkent va Namangan viloyatlarida qor ko‘chish xavfi eʼlon qilingan.
Izoh (0)