18-iyul kuni Hindiston kinoteatrlarda Yash Raj Films studiyasi tomonidan suratga olingan “Saiyaara” nomli romantik musiqiy film premyerasi bo‘lib o‘tdi. Unda Chanki Pandeyning jiyani Ahan Pandey va yosh aktrisa Anit Padda (u ilgari “Salaam Venky” filmida Kadjol bilan birga rol o‘ynagan va “Katta qizlar yig‘lamaydi” serialida ishtirok etgan) debyut qildi.
Film ijodkorlari loyihani taqdim etishdan avval noodatiy qarorga kelishdi — ular reklama kampaniyasi o‘tkazishdan bosh tortdi. Bosh rollarni ijro etgan Ahan va Anit ommaviy axborot vositalari bilan umuman muloqot qilmadi, hech qanday intervyu bermadi va film mualliflari targ‘ibot ishlari bilan shug‘ullanmadi.
Bu yondashuv bugungi kundagi odatiy reklama strategiyalaridan keskin farq qiladi. Odatda Bollivudda tanish-bilishchilik juda chuqur ildiz otgan, bunday aktyorlar o‘z loyihalarini keng targ‘ib qilishga harakat qiladi. Ammo bunday tartib tomoshabinni premyeradan ancha oldin zeriktirib qo‘yadi. Turli tadbirlar va ijtimoiy tarmoqlarda doimiy ko‘rinish berish ba’zida film obro‘siga putur yetkazadi.
Shu sababli rejissyor Moxit Suri filmni reklamasiz olib chiqish va bosh qahramonlarni premyeragacha sahnaga chiqarmaslikni rejalashtirdi. U nepotizm haqidagi bahslar va befoyda savollarga to‘la intervyulardan qochishni istadi:
“Bollivudda targ‘ibot ishlari doim ham filmning o‘ziga qaratilmaydi. OAV bilan muloqot, asosan, ‘ijodiy jarayondagi qiziqarli voqealar’ va shunga o‘xshash ortiqcha savollar bilan chegaralanib qoladi”, deydi rejissyor.
Oxir-oqibat bunday strategiyaga ega film katta muvaffaqiyatga erishdi: filmga atalgan saundtrek hitga aylandi va “Saiyaara” yangi aktyorlar ishtirokidagi eng shov-shuvli debyut sifatida e’tirof etildi.
“Saiyaara” syujeti jihatidan 2013-yildagi “Ish yo‘lidagi hayot 2” filmiga o‘xshash melodrama. Film mashhurlik bosimi ostida qolgan yigit va mustaqil yashashni istagan qiz o‘rtasidagi sevgi haqida hikoya qiladi. Ular musiqaga bo‘lgan qiziqish orqali tanishib, shaxsiy muammolari va jamiyat bosimi fonida munosabatlarini saqlab qolishga harakat qiladi.
Izoh (0)