Yaponiyaning Fujitsu kompaniyasi Intel Lunar Lake protsessoriga ega yangi FMV Note U nomli noutbukini taqdim etdi. Ishlab chiqaruvchining ma’lumotlariga ko‘ra, mazkur gadjet Copilot+ (takomillashtirilgan SI) o‘rnatilgan dunyodagi eng yengil noutbukdir.
Ultrabukning og‘irligi 848 gramm, qalinligi esa 2,54 santimetrni tashkil etadi. Korpus ingichka bo‘lishiga qaramay, u 64 Vt quvvatga ega katta hajmli akkumulyatorni o‘z ichiga olgan. Uning quvvati 36 soatgacha kutish rejimida ishlash imkonini beradi. Uzluksiz videolarni tomosha qilish vaqti esa 15,5 soatni tashkil etadi.
FMV Note U 1920x1200 pikselli, 14 dyuymli IPS panelga ega. Shuningdek, ultrabuk barmoq izlari uchun sensor va 1080p sifatli veb-kamera bilan jihozlangan.
Windows qurilmasining chipsetida 4,8 gigagerts tezligiga ega to‘rtta yadro va Intel Arc Graphics 140 grafik moduli o‘rnatilgan. NPU (Neural Processing Unit) maxsus protsessor chipi shovqinni kamaytirish, avtomatik subtitrlar, tasvir yaratish va Microsoft Recall uchun ilovalarni yaratish vaqtini tezlashtiradi.
FMV Note U noutbuki Thunderbolt 4-ni qo‘llab-quvvatlaydigan ikkita USB-C porti, ikkita USB-A porti, HDMI 2.1, microSD uchun slot, 3,5 mm quloqchin uchun slotga ega.
Bundan tashqari, mazkur noutbuk Gigabit Ethernet — ma’lumotlarni 1 gigabit/s (1 Gbps yoki 1000 Mbps) tezlikda uzatishga mo‘ljallangan tarmoq texnologiyasiga ham ega. Bu Ethernet standartlarining takomillashtirilgan versiyasi bo‘lib, asosan, yuqori tezlikda ma’lumot uzatishni talab qiladigan tarmoq tizimlarida qo‘llaniladi. Bu tizim yengil noutbuklar uchun kamyobdir.
Fujitsu kompaniyasining noutbuklari faqat Yaponiya va AQShda sotiladi. Core Ultra 5 va 16/256 GB xotiraga ega asosiy model 214 000 iyena (≈1373 dollar) turadi. Flagman konfiguratsiyasi Core Ultra 7 hamda 32 GB operativ xotira va 2 TB xotira bilan birga keladi. Uning narxi 332 800 iyena (≈2135 dollar).
Izoh (0)