O‘zbekiston xalq artisti Yulduz Usmonova fevral oyida o‘tkazilishi kutilayotgan 20 kunlik konsert dasturi oldidan OAV xodimlariga intervyu berdi hamda ularni qiziqtirgan ko‘plab savollarga javob berdi.
— Ertagami yoki bir yildan keyin men ham bu yerda bo‘lmay qolishim mumkin. Bu hayot, Inna lillahi va inna ilayhi rojiun. Undan keldik, unga ketamiz. Eng xursand bo‘ladigan joyini aytaymi, Halima o‘tgani bilan o‘rni bor. Inson bo‘lib kim nima qoldirdi? Har kim har narsa dedi, lekin hamma Halimani xotirlayapti. Kecha ustidan yozganlar bugun mehribonchilik qilib o‘tiribdi. Shuning uchun insonga tirikligida mehribonchilik qilish kerak, o‘lganidan keyin unga hech narsa kerak emas. Mendan so‘rasangiz, u men uchun o‘lmagan. Mana Obid o‘rtog‘im (qiziqchi Obid Asomov) o‘tib ketdi. Vaqti-soati kelib men ham tark etaman dunyoni, lekin Allohning yoniga qanday borishim haqida o‘ylayman. Men marhum do‘stlarimning ortidan duo qilmasam, qanday do‘st bo‘ldim?
“Halima o‘lganidan keyin to‘yga bordim”
— Mening birovdan uyaladigan, tortinadigan joyim yo‘q. Borim shu. Ha, men Halima o‘tganidan keyin ham, akam o‘lganida ham to‘yga bordim. Chunki odamlar menga ishonib dasturxon yozib qo‘ygan, mehmon chaqirib qo‘ygan. Xizmat qilish mening vazifam. Men shuni bo‘ynimga olib, shu kasbni tanlaganman. Men sizlar aytgandek charchadim, deyolmayman. Mazam yo‘q, deyolmayman, agar o‘lmayotgan bo‘lsam yurib chiqamiz. Biz eski maktabning san’atkorlarimiz. Shuning uchun har kim har narsani gapiravermasin.
Falastinliklarga uy bergani haqida
— Menga sizlarning maqtovingiz ham, yomonlashingiz ham kerak emas. Sizga yoqmasam ko‘zingizni yumib o‘tib ketavering. Men bu ishni Alloh rizoligi uchun qildim. Allohdan qo‘rqmasam hech narsa qilmasdim. Sizlarga to‘g‘risini aytaman. Menda ham xasislik bor, shunchaki men Allohdan qo‘rqaman. Bergan ne’matini olib qo‘yishidan qo‘rqaman. Kelib turgan omadim teskari qarab qolishidan qo‘rqaman. Ertaga Alloh bilan yuzlashganimda “Sen nima qilding? Bo‘lishdingmi?”, desa nima deyman.
Muxlislarim — mening oilam
— Turmush o‘rtog‘im “Bor ishla”, desa deydiki, to‘yga bormaysan demaydi. Agar shunday deydigan bo‘lsa, o‘sha kuni oila ham tugaydi. U mening ishimni bo‘yniga olgani, muxlisimni qabul qilgani uchun biz bir oilamiz. Mening oilam — muxlislarim. Qizim mendan xabar olmasa olmaydiki, muxlislarim mendan xabar oladi. Rahmatli Gavhar Rahimovanikida yurardik, o‘shanda “Hecham nevaralari kelmaydiya?”, deb hayron bo‘lardim. Chunki ular oyda yilda bir mehmon bo‘lib kelardi. Biz esa har kuni yonida edik. Ularning muxlislari biz ekanmiz. Shogirdlari bolalaridek bo‘lib qolar ekan.
Rasmimga bolta otib o‘tiradiganlar bor
— Yaqinda bir konsert bannerida meni rasmimni kichkina qilib, bitta xonandani tagiga qo‘yib qo‘yishgan ekan. Menga shu gapni aytib kelishdi, “Rasmimni menga desa bannering orqasiga qo‘ymaydimi, gonorarimni berishsa bo‘ldi”, dedim. Ko‘pchilik rasmni katta qilib qo‘ysam men uning ustiga chiqib oldim, deb o‘ylaydi. Bu rasm. Hayotda ro‘paramga kel, sen oyoqni tagida qolasan. Hammaning o‘z o‘rni bor. Sen ro‘paramga kelsang, men senga joyingni ko‘rsataman. Lekin sen rasm bilan olishadigan bo‘lsang, nima foydasi bor? Men bilaman, o‘zimning hamkasblarim orasida rasmimni qo‘yib, bolta otib o‘tiradiganlar, nina tiqib o‘tiradiganlar bor. Uyimga kelib qanchasi otib ketadi. Men Allohga shukur qilaman, ular rasm bilan olishyapti. Agar mard bo‘lsa, Allohdan qo‘rqsa kelsin, men ularga joyini ko‘rsatib qo‘yaman.
Meni yuvosh bo‘ldi, hojiona bo‘ldi, deb o‘ylashadi. Men hojiona bo‘lib o‘zimni ushlagandirman, lekin joyi kelsa haliyam kuch-quvvatim yetadi, gapimniyam gapiraman, kerak bo‘lsa qo‘lim bilan joyiga ham o‘tqizaman, kallasini ham yorib qo‘yaman. Chunki yaxshi gapga quloq solmagan odam kaltak bilan odam bo‘ladida.
Yulduz Usmonova bilan intervyu hamda konsertga tayyorgarlik jarayonini quyida to‘liq tomosha qilishingiz mumkin.
Izoh (0)