Urugvay sobiq prezidenti Xose Muxika saraton kasalligini davolashdan bosh tortdi va vatandoshlari bilan vidolashdi. Bu haqda elDiario.es mahalliy portali xabar berdi.
Siyosatchi 2012-yilda BBC tomonidan ko‘pchilik saylovchilar kabi yashagani sababli dunyodagi eng qashshoq prezident deb topilgandi. Muxikaga ko‘ra, qizilo‘ngachidan topilgan saraton endi jigariga ham tarqalgan.
“Qizilo‘ngachdagi saraton jigarimni egallamoqda. Men uni hech narsa bilan to‘xtata olmayman. Nega? Chunki men keksaman va ikkita surunkali kasalim bor. Menga na kimyoviy davolash, na jarrohlik mos keladi, chunki tanam bunga bardosh berolmaydi”, degan u.
Muxika, shuningdek, bundan buyon intervyu bermasligi va yangi davolanishni rejalashtirmasligini aytgan.
“Men faqat tinch qo‘yishlaringizni so‘rayapman. Behuda intervyular yoki boshqa narsalar bilan bezovta qilmang. Mening davrоnim allaqachon nihoyasiga yetdi. Ochig‘ini aytsam, jon berayapman va jangchining orom olishga haqqi bor”, deya qo‘shimcha qildi Urugvay sobiq rahbari.
U dafn etilishi uchun barcha tayyorgarliklarni ko‘rib qo‘yganini ta’kidlagan. Muxika 2010-yildan 2015-yilgacha Urugvay prezidenti lavozimida ishlagan, so‘ngra mamlakat parlamentiga saylangan. 2018-yil avgust oyida u vakolatlari 2020-yilda tugashiga qaramay, iste’foga chiqish to‘g‘risidagi arizasini yozgan. Sobiq prezident buning sababini “uzoq yo‘ldan charchagani” bilan izohlagan.
Izoh (0)