London parlamentiga o‘q o‘tkazmaydigan jilet kiygan va ikki katana (samuray qilichi) ko‘tarib kelgan erkak qo‘lga olindi. Bu haqda Telegraph xabar berdi.
Ma’lum qilinishicha, erkak 12-noyabr kuni Buyuk Britaniyaning sobiq bosh vaziri Boris Jonson bilan “suhbatlashish” uchun kelgan. Huquq-tartibot idoralari xodimlari 34 yoshli erkakni parlament binosi oldida ushlagan. Voqea yuz bergan kunni o‘zidayoq u Vestminster magistratura sudida ishtirok etgan.
Prokuror sudga ayblanuvchi Londonga Kembridjshirdan kelgani, o‘q o‘tkazmaydigan jilet kiygani va parlamentga “Boris Jonson bilan uchrashish uchun ikki samuray qilichi bilan kelganini” aytgan.
Ta’kidlanishicha, 34 yoshli Lyuis Ellington 12-dekabrga belgilangan tinglovgacha garov evaziga qo‘yib yuborilgan. Unga Londonga tashrif buyurish taqiqlangan, ayblanuvchi sudgacha tibbiy muassasada nazoratda bo‘ladi.
Boris Jonson iste’fosi
Uch yil davomida Britaniya bosh vaziri lavozimini egallab kelgan Boris Jonson 2022-yil iyul oyida, qator janjallardan so‘ng iste’foga chiqqan edi. Sentabr boshida Konservatorlar partiyasi yangi saylovlar o‘tkazdi, unda o‘sha paytda Britaniya Tashqi ishlar vazirligini boshqargan Liz Trass g‘alaba qozondi. Bosh vazir sifatida Trass nomaqbul iqtisodiy islohotlarni taklif qildi va 45 kundan keyin iste’foga chiqishga majbur bo‘ldi. Jonson yana lavozim uchun kurashishga urinib ko‘rishi kutilgandi, biroq u bosh vazirlikka nomzodini qo‘yishdan bosh tortdi.
Konservatorlar partiyasi rahbari uchun navbatdagi saylov 24-oktyabrga belgilangan edi, ammo u o‘tkazilmadi, chunki sobiq moliya vaziri Rishi Sunak bosh vazirlikka yagona nomzod bo‘lib qoldi. Ovoz berishdan biroz oldin, asosiy raqib, Jamoatlar palatasi rahbari Penni Mordont Sunakni qo‘llab-quvvatlab, o‘z nomzodini qaytarib oldi.
4-iyul kuni Britaniya bo‘lib o‘tgan parlament saylovlarida Kir Starmerning Leyboristlar partiyasi ko‘pchilik o‘rinni qo‘lga kiritdi. U Rishi Sunakdan keyin Buyuk Britaniyaning bosh vaziri bo‘ldi. Rishi Sunakning Konservativ partiyasi esa 14 yillik hukmronligi davomida ilk bor ozchilik o‘rinni egalladi.
Izoh (0)