Rossiya armiyasi 15-sentyabr kuni Ukrainaning Xarkov shahriga boshqariladigan aviabombalar bilan hujum qildi. Hodisa oqibatida kamida 30 kishi halok bo‘ldi. Bu haqda Ukraina prezidenti Vladimir Zelenskiy xabar berdi.
Hujumni Xarkov shahri meri Igor Terexov ham tasdiqlagan. U Rossiya tomonidan boshqariladigan aviabombalar qo‘llanganini aytgan. Ko‘p qavatli turar joy binosi zarar ko‘rgan.
“Xarkovda qutqaruv operatsiyasi davom etmoqda. Rossiyaning aviabombalar bilan zarbasi. Oddiy turar joy binosi, ko‘p qavatli uyga zarar yetgan. 9 va 12-qavatlar oralig‘ida yong‘in va o‘pirilishlar kuzatilgan. Hozirda 30 ga yaqin yaradorlar, shu jumladan, bolalar borligi ma’lum”, degan Zelenskiy.
U yana bir bor Ukrainaga Rossiya harbiy aviatsiyasidan himoyalanishga yordam berishga chaqirgan.
“Dunyo Rossiya harbiy aviatsiyasidan, har kuni ukrainaliklarning hayotiga zomin bo‘layotgan o‘nlab boshqariladigan bombalardan himoyalanishga yordam berishi kerak. Bu terrorni to‘xtatish mumkin. Ammo buning uchun obyektiv zarur bo‘lgan kuchli qarorlar oldidagi qo‘rquvni to‘xtatish kerak. Bu urushni faqat qat’iyat bilan adolatli yakunlash mumkin. Aynan qat’iyat terrordan samarali himoya qiladi”, degan Ukraina prezidenti.
Izoh (0)