Fransiyaning Parij shahrida yozgi Olimpiada bahslarida boks musobaqalari ham davom etmoqda.
-57 kg vazn toifasida o‘zbekistonlik bokschi Sitora Turdibekova kongolik Marselat Sakobi Matshuga qarshi ringga ko‘tarildi.
Birinchi raund 1:4 hisobida kongolik bokschi hisobiga yozildi. Ikkinchi raundda esa Sitora faollikni qaytardi va 5:0 hisobida ustun keldi. Uchinchi raund ham o‘zbekistonlik bokschining foydasiga hal bo‘ldi va Sitora Turdibekova keyingi bosqichga yo‘l oldi.
Endi u 2-avgust kuni ikki karra jahon chempioni, xitoy taipeyilik Yu-Ting Linga qarshi chorak final yo‘llanmasi uchun jang qiladi.
Ma’lumot uchun, Turdibekova 2002-yil 20-may kuni Samarqand viloyati Bulung‘ur tumanida tavallud topgan.
Sitora 2021-yil kattalar o‘rtasidagi Osiyo chempionatida oltin medalni qo‘lga kiritgan. 2022-yil Toshkentda o‘tgan U-22 qit’a birinchiligida bronza, 2023-yil Bangkok mezdonlik qilgan ayni shu toifadagi chempionatda esa kumush medal sohibiga aylangan. Ko‘rsatgan natijalari evaziga “Shuhrat” medali bilan taqdirlangan.
