Baydenning rafiqasi erining prezidentlik kampaniyasiga mablag‘ yig‘ish uchun Parijda tadbir o‘tkazadi

AQSHning birinchi xonimi Jill Bayden Parijda turmush o‘rtog‘ining saylovoldi kampaniyasi uchun mablag‘ yig‘ish tadbirini o‘tkazadi, deya xabar bermoqda CNN.

Oq uy matbuot xizmati avvalroq ma’lum qilganidek, 26-iyul kuni Parijda bo‘lib o‘tadigan Olimpiada o‘yinlarining ochilish marosimida AQSH delegatsiyasiga Jill Bayden boshchilik qiladi, 11-avgust kuni esa yopilish marosimiga vitse-prezident Kamala Harrisning turmush o‘rtog‘i Duglas Emhoff keladi.

“AQSH saylov kampaniyalariga xayriyalar faqat Amerika fuqarolari tomonidan amalga oshirilishi mumkin, shuning uchun federal saylov qonunchiligiga rioya etilishini ta’minlash maqsadida tadbirda ishtirok etishni xohlovchilar pasport fotosurati sahifasining nusxasini ko‘rsatishi kerak. Chiptalar narxi 500 dan 25 ming AQSH dollarigacha bo‘ladi”, deyiladi telekanal xabarida.

So‘nggi kunlardagi Baydenning xatti-harakatlaridan kelib chiqib ko‘plab demokratlar davlat rahbarini poygadan voz kechishga chaqirmoqda.

Telekanalning taʼkidlashicha, birinchi xonim “prezidentning eng yaqin maslahatchisi va Oq uyda taʼsir o‘tkazuvchi ashaddiy himoyachisi bo‘lib qolmoqda”.

Bir kun avval CNN manbalariga tayanib xabar berishicha, Demokratik partiya donorlari, agar partiya yetakchilari Baydenni qayta saylanishdan voz kechishga undaydigan choralar ko‘rmasa, badallarni muzlatish bilan tahdid qilgan.

“Ularning fikricha, agar Jo nomzodlar ro‘yxatini boshqarsa, Vakillar palatasi va Senat ham yutqazadi”, deya ta’kidladi telekanal suhbatdoshlaridan biri.

Axios portalining yozishicha, Demokratik partiya rahbariyatining bosimi ortib borayotgani sababli, Baydenni keyingi hafta oxirigacha kampaniyani davom ettirishdan voz kechishga ko‘ndirish mumkin.

Shu bilan birga, Baydenning saylovoldi kampaniyasini boshqarayotgan Jen O’Melli-Dillon aytganidek, prezident respublikachi nomzod Donald Trampni mag‘lub eta olishiga ishonchi komil.

“Tanlov har doimgidek aniq. Prezident Bayden Donald Trampni mag‘lub eta olishiga bo‘lgan ishonchi har qachongidan ham qat’iyroq”, deya O’Melli-Dillon so‘zlarini keltirgan The Hill sayti.