Afg‘onistondagi xayriya guruhlariga yuborilgan 293 million dollar mablag‘dan “Tolibon” yoki boshqa jangari guruhlar foydalangan bo‘lishi mumkin. Bu haqda AQSH davlat departamentiga tayanib, Dawn xabar berdi.
Departamentning ikki byurosi Afg‘onistondagi xayriya tashkilotlarini tekshirish bo‘yicha ichki qoidalarga rioya etganliklarini isbotlay olmagan.
Davlat bu yordamdan aslida kim naf ko‘rayotganini bilishi muhim, bu yordam “Tolibon” yoki boshqa sanksiyalangan tomonlarga yo‘naltirilishiga yo‘l qo‘ymasligi lozim, deyiladi Afg‘onistonni qayta tiklash bo‘yicha maxsus bosh inspektor (SIGAR) hisobotida.
“Tolibon” AQSH ajratgan pullarni “bir qancha vositalar, jumladan, gumanitar tashkilotlarni tashkil etish orqali” olishga uringan va departament “hamkorlari tomonidan yuzaga keladigan xavf-xatarlarni to‘liq va izchil baholash” zarurligini ta’kidlagan.
SIGAR’ning ta’kidlashicha, davlat departamentining beshta byurosidan uchtasi yordam jamg‘armasi oluvchilarni tekshirishni talab qiladigan departament qoidalariga rioya qilgan. Ammo Demokratiya, Inson huquqlari va mehnat byurosi hamda Xalqaro narkotiklarga qarshi kurash va huquqni muhofaza qilish ishlari byurosi o‘zlarining sodiqligini isbotlovchi yetarli hujjatlarni taqdim eta olmagan.
Shu tariqa, davlat departamenti Afg‘onistonga ajratilgan kamida 293 million dollar mablag‘ qay maqsadda foydalanilganini isbotlay olmagan.
Shu sababdan mablag‘lardan “Tolibon” va terrorizmga aloqador shaxslar, tashkilotlarning noqonuniy foyda olishi xavfi yuqori, deyiladi hisobotda.
Izoh (0)