“Mening qo‘shnim Totoro” animesining bosh qahramonlari ko‘chib o‘tadigan qishloqdagi shinam uy yodingizdami? Tez orada shunday uyning kichik prototipi har bir anime ixlosmandlari uchun sotuvga qo‘yilishi kutilmoqda.
Yaponiyalik rejissyor Hayao Miyazaki asaridagi Satsuki va Mey ismli opa-singillar yashagan uyning mitti varianti Studio Ghibli tomonidan ishlab chiqildi.
Mualliflar animedagi uyni “devordagi bo‘yoqlari xiralashgan va bir nechta qismi shikastlangan eski uy”, deb ta’riflagan.
Mazkur uy bir nechta binolardan iborat. Unda shinam xonalar, opa-singillar cho‘milgan hammom, turli anjomlar, taxtacha, gaz plitasi va hatto rakovina bilan jihozlangan oshxona mavjud.
Uyda Satsuki bento tort uchun maxsus qutilar tayyorlagan xona ham tasvirlangan. Qizlar otasining kabineti kitoblar bilan to‘la, stolda esa Mey dadasiga sovg‘a qilgan bir quchoq gullar turibdi.
Uyning barcha ajoyibotlarini o‘z ko‘zingiz bilan tomosha qilish uchun tomni olib tashlash mumkin. Eshiklar va derazalar ham ochiladi. Xonalarda o‘zgacha tarovat baxsh etuvchi yoritgichlar ham bor.
Modelning o‘lchamlari 52,3×27,3×41,8 sm bo‘lib, 20-iyuldan boshlab taxminan 300 AQSH dollari narxida sotuvga chiqariladi.
Izoh (0)