Somali poytaxtida 14-iyul kuni yuz bergan terakt oqibatida 5 kishi halok bo‘ldi. Bu haqda Reuters nashri xabar berdi.
Manbada aytilishicha, yakshanba kuni Somali poytaxti Mogadishu shahridagi restoranlardan birining oldida ichiga bomba o‘rnatilgan mashina portlatilgan. Hodisa oqibatida yaqin-atrofdagi tinch aholi vakillari va bir qancha davlat muassasalariga jiddiy shikast yetgan.
Politsiya hodisa oqibatida 5 kishi halok bo‘lgani va 20 kishi jarohatlanganini rasman tasdiqlagan. Rasmiylar teraktda diniy radikal guruhlarni ayblagan.
Portlatilgan mashinaning asosiy manzili Mogadishudagi prezident saroyi bo‘lgan. Ammo transport manziliga yetib bormasdan nomaʼlum sababga ko‘ra yo‘lda portlab ketgan.
Terakt uyushtirilgan mashina 10 ga yaqin avtomobilni yaroqsiz holga keltirgan. Portlash prezident saroyiga yaqin kuchli qo‘riqlanadigan hududda ro‘y bergan.
Portlash uchun javobgarlikni Somalidagi “Al-Shabab” jangarilari o‘z zimmasiga olgan. Bu guruh mamlakatning janubiy qismlarida o‘rnashib, ekstremistik va radikal g‘oyalar taʼsirida terroristik hujumlar tashkil etib kelgan.
Mogadishu hokimiyati portlash yuz bergan hududni qo‘riqlashga javobgar bo‘lgan politsiya shtabini masʼuliyatsizlikda ayblagan. Chunki politsiya xodimlari halokat yuz bergan paytda Yevro—2024 futbol musobaqasini tomosha qilayotgan bo‘lgan.
Izoh (0)