Pokiston hukumati sobiq bosh vazir Imron Xonning partiyasini mamlakat hududida taqiqlashni rejalashtirmoqda. Bu haqda Pokiston axborot vaziri bergan maʼlumotga asoslanib, Reuters nashri xabar berdi.
Manbaga ko‘ra, “Adolat harakati” partiyasi faoliyatiga chek qo‘yish borasida Pokiston hukumatiga bir necha bor murojaat yuborilgan. Islomobod hukumatiga yaqin manbalar ushbu maʼlumotni tasdiqlagan.
Partiyaga taqiq qo‘llash uchun asos bo‘ladigan bir qator sabablar keltirilgan. Xususan, rasmiylar “Adolat harakati” partiyasini mamlakatdagi nomaʼlum manbalar hamda xorijiy tarmoqlardan pul olganlikda ayblagan.
Markaziy hukumatning qator rasmiylari partiyani o‘tgan yili harbiy obyektlarga hujum uyushtirilishiga olib kelgan tartibsizliklarni tashkil etishda ayblagan. Bu borada tekshiruv va o‘rganishlar davom etayotgani bildirilgan.
Federal hukumat “Adolat harakati”ni taqiqlash bo‘yicha ish qo‘zg‘atadi. Agar kerak bo‘lsa, Vazirlar Mahkamasi va Oliy sud ham bu ishga aralashadi, deyiladi Islomobod rasmiylari eʼlon qilgan xabarda.
Maʼlumot o‘rnida, taqiqqa uchrash arafasida turgan partiya rahbari, mamlakat sobiq bosh vaziri Imron Xon avgust oyidan beri hibsda saqlanmoqda. U uchinchi rafiqasi bilan noqonuniy va noshar’iy asosda oila qurib yashab kelganlikda ayblangan edi.
Sud Imron Xonga qo‘yilgan ayblov o‘z tasdig‘ini topmagani uchun uni bekor qilgan. Shunga qaramay, hech bir modda bo‘yicha aybdorligi isbotlanmagan sobiq bosh vazir ozodlikka chiqarilmayapti.
Izoh (0)