Nepalda 12-iyul kuni yuz bergan avtobus halokati oqibatida 55 kishi bedarak yo‘qolgan. Bu haqda Al Arabiya nashri xabar berdi.
Manbada aytilishicha, yo‘lovchilarni olib ketayotgan avtobus kuchli yomg‘ir yog‘ishi va ko'chki oqibatida yo‘ldan chiqib ketib, daryoga ag‘darilgan. To‘lib oqayotgan daryo esa avtobusni oqizib ketgan.
Halokatga uchragan avtobus ichida 65 nafar yo‘lovchi bo‘lgan. Tezkor qidiruv jarayonida 10 kishining jasadi topilgan.
Yuzlab xavfsizlik xodimlari va qutqaruvchilar ishtirokida qidiruv ishlari davom etayotgani xabar qilingan. Avtobusda qolib ketgan 55 kishi haligacha topilmagan.
Halokat poytaxt Katmandudan 86 kilometr g‘arbda joylashgan Chitvan tumanida ro‘y bergan. Hududda kuchli yog‘ingarchilik va favqulodda holat yuzaga kelgani bois qutqaruv operatsiyalarini tezda boshlash imkoni bo‘lmagan.
“Omon qolganlarni topish imkoniyati yo‘q. Bizning diqqatimiz faqat jasadlarni topishga qaratilgan”, — degan Chitvan tumanidagi politsiya idorasi xodimi Bhesh Raj Rijal.
Nepalda iyun oyi o‘rtalaridan beri davom etayotgan kuchli musson yomg‘irlari sabab favqulodda vaziyat eʼlon qilingan. Hozirga qadar ko‘chki va toshqinlar oqibatida 100 dan ortiq fuqaro halok bo‘lgani xabar qilingan.
Ko‘chkidan so‘ng hukumat noqulay ob-havo prognozi bo‘lgan hududlarda avtobuslarning tungi vaqtda harakatlanishini taqiqlash rejasini eʼlon qilgan.
Izoh (0)