Samarqand viloyati Oqdaryo tumanida qo‘lbola usulda alkogol mahsulotlari ishlab chiqarayotgan xonadon aniqlandi. Bu haqda Prokuratura departamenti xabar berdi.
Unga ko‘ra, holat Bosh prokuratura huzuridagi departamentning Oqdaryo tuman bo‘limi va Samarqand viloyati IIB xodimlari hamkorligida o‘tkazilgan tezkor tadbirda aniqlangan.
Fuqaro R.R. o‘z uyida yashirin sex tashkil etib, qo‘lbola alkogol mahsulotlari ishlab chiqarayotgani aniqlanib, ushbu xonadondan inson hayoti va sog‘lig‘i uchun xavfli bo‘lgan 580 litr etil spirti, 1 123 dona shisha qopqoq, “Russkaya vodka” nomli etiketkalar hamda 445 dona shisha idish va boshqa ishlab chiqarishda foydalanilgan tovar moddiy boyliklari ashyoviy dalil sifatida olingan.
Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)