Suratga olish jarayonida Gollivud yulduzlarini haqiqatan ham qo‘rqitib yuborgan sahnalar

Ba’zida kinoda suratga tushish aktyorlar uchun xavf tug‘diradi: suratga olish ekstremal sharoitlarda bo‘lishi mumkin yoki aksar epizodlar muayyan tayyorgarlikni talab qiladi. Yulduzlar rol o‘ynash jarayonida ba’zi fobiyalarga ham duch keladi.

“Bir vaqtlar... Gollivudda” (2019)

Leonardo Di Kaprio qahramoni aktyor Rik Dalton o‘zi suratga tushgan filmda ognemyotdan foydalangan sahnadan asabiylashadi. Kaskadyorlar bo‘yicha koordinator Robert Alonso Leo kaskadyorlardan birini xafa qilib qo‘yishidan qo‘rqqanini aytadi. Yulduzni tinchlantirish uchun Robert mashq paytida o‘zini yoqishga ruxsat beradi. Shunday qilib Di Kaprio kaskadyor butunlay xavfsiz ekanligiga ishonch hosil qiladi. Biroq keyinchalik Leonardo karyerasida birinchi marta ognemyotdan otgan kunni “haqiqatan ham mashaqqatli” deb ataydi.

“Avatar: Suv yo‘li” (2022)

Jeyms Kemeron blokbasterining ko‘plab asosiy sahnalari suv ostida suratga olinadi va bu Neytiri rolini ijro etgan Zoe Saldanani juda qo‘rqitadi. 

“Rolni qo‘lga kiritmaguningizcha o‘zingizni har narsaga tayyordek ko‘rsatasiz. Rejissyorga ham hammasini uddalayman, deysiz, ammo keyin qo‘rquv boshlanadi”, deydi u.

Suv ostidagi epizodlarda ishtirok etgan aktyorlar intensiv mashg‘ulotlardan, jumladan, nafasni ushlab turish mashqlaridan o‘tishadi. Saldana suv ostida besh daqiqagacha nafas olmaslikni uddalaydi.

“Suv ostida” (2020)

Kristen Styuart burg‘ilash stansiyasining boshqa xodimlari bilan birga Mariana botig‘i tubida 11000 metr chuqurlikda qolib ketgan qiz Nora Prays rolini o‘ynaydi.

Aktrisaning ta’kidlashicha, rol sabab u suvdan vahimaga tushishni yengishga harakat qilishi kerak edi. “Bu haqiqatan ham qiyin edi”, deb tan oladi Kristen. Aktrisa aynan shu filmning suratga olish ishlaridan nafratlanishini va o‘sha kadrlarni eslashni xohlamasligini aytadi.

“Tort” (2014)

“Tort” dramasida Jennifer Enistonning qahramoni Kler surunkali og‘riq va giyohvandlikka qarshi kurashda suv terapiyasi oladi. Bunday sahnalar bir nechta bo‘lgan va aktrisa ularda juda qiynalgan, chunki u suv ostiga sho‘ng‘ishdan juda qo‘rqardi.

Bu qo‘rquv yoshligida uch g‘ildirakli velosipedda hovuzga tushib ketgani, akasi uni qutqarmaguncha rulni qo‘yib yubormagani va tashqariga suzib chiqa olmagani sababli paydo bo‘lgan.

“Yura davri olami 2” (2018)

Dinozavrlar haqidagi franshizaning bir epizodida Brays Dallas Hovard va Jastisa Smit o‘ynagan Kler va Franklin girosferada jardan qulab tushadi. Rejissyor Xuan Antonio Bayona ularning reaksiyalari imkon qadar real bo‘lishini xohlaydi. Braysning ta’kidlashicha, suratga olish paytida u juda qo‘rqib ketgan, hatto haddan tashqari qo‘rquv sabab hushidan ketgan.

“U 2” (2019)

Mashhur roman asosida suratga olingan filmda Bill Heyder Pennivays bilan to‘qnash kelgan epizoddan juda qo‘rqqan. “U 2” komedik rollari bilan tanilgan aktyor karyerasidagi birinchi dahshatli film edi. 

“Men asabiylashganda yoki qo‘rqib ketganimda kulaman, bu juda bema’ni ko‘rinadi”, deb tushuntiradi Bill.

“Dyuna” (2021)

Rebekka Fergyuson Frank Gerbertning ilmiy-fantastik romaniga asoslangan filmning birinchi qismini suratga olishda qiynaladi. Yulduz klostrofobik, shuning uchun u qahramoni Jessika xonim va Timoti Shalame rolini o‘ynagan Pol ornitopterda uchadigan sahnalarda suratga tushishdan qo‘rqadi.

“Uddalab bo‘lmas topshiriq” (2015)

Rebekka Fergyuson uning qahramoni Ilsa va Tom o‘ynagan Itan Hantning opera teatri tomidan sakrashi kerak bo‘lgan epizoddan vahimaga tushadi.

Bu sahna suratga olishning birinchi kunida bo‘lib, aktrisa “Tom Kruzning qulog‘iga hayotidagi eng behayo so‘zlarni aytib baqirganini” eslaydi. Aktrisa 4,5 metr balandlikdan “qulash” paytida o‘zini xavfsiz va qulay his qilishini ta’minlash uchun kaskadyorlar jamoasi bilan yaqindan hamkorlik qiladi.

“Kod 355” (2022)

Lupita Nyongo Saymon Kinberg filmida Xadicha rolini o‘ynab, ko‘plab tryuklarni ijro etsa-da, balandlikdan juda qo‘rqadi.

Yulduz darhol u bilan ishlaydigan kaskadyorlar guruhiga balandlikdan qo‘rqishini aytadi. “Birinchi marta pastga tushayotganimda rosa baqirganman”, deb eslaydi aktrisa.

“Yo‘q” (2022)

Bir necha yil oldin Deniyel Kaluya ot minganda qattiq jarohatlangan. O‘shandan beri aktyor otlardan qo‘rqib qoladi, lekin baribir Jordan Pilening fantastik filmida ishtirok etish uchun qo‘rquvini yengishga harakat qiladi.

Deniyel chorvador va tajribali chavandoz Ojayni o‘ynay oladimi yoki yo‘qligini bilish uchun atigi bir hafta vaqti bor edi. Aktyor ot minib, ular atrofida o‘zini qulay his qilishi uchun otlar tagini tozalab yurgan. Biroq suratga olish paytida baribir vahimaga tushgan.