Samsung kompaniyasi smartfonni imo-ishoralar orqali boshqarish imkonini beruvchi futuristik “Shortcut Sneaker” krossovkalarining cheklangan sonini namoyish etdi. Bu haqda Europa Plus nashri xabar berdi.
Krossovkalar Cheil Benelux kreativ agentligi, elektronika ishlab chiqaruvchi Elitac Wearables hamda Brut Amsterdam kompaniyasi bilan hamkorlikda ishlab chiqilgan. Poyabzalning dizayni Roel van Xoffga tegishli. Marketing menejeri Gerben van Uoly Meyer smartfonlarni boshqaruvchi krossovka haqida shunday deydi:
“Samsung kompaniyasi nafaqat hayot tarzimizni yengillashtirish, balki uni boyitish uchun ham innovatsiyalar yaratadi. Biz sizlarga “Shortcut Sneaker” nomli kelajak krossovkalarini taqdim etamiz. Poyabzal smartfoningizni harakatlanish paytida boshqarish imkonini beradi”.
Krossovka tagida harakat datchiklari o‘rnatilgan bo‘lib, ular qo‘ng‘iroq qilish yoki musiqani yoqish kabi smartfonning ma’lum funksiyalarini faollashtiradi.
Misol uchun, agar foydalanuvchi Maykl Jeksonning “oyda yurish” raqs harakatini (orqaga surilish) amalga oshirsa, smartfon musiqa ijro etadi. Yoki ikkita tovon bir-biriga tegilsa, avvaldan tanlab olingan biror raqamga qo‘ng‘iroq qilinadi.
Samsung krossovkalarning tashqi ko‘rinishi ustida professional dizayner ishladi. Oyoq kiyimlarni yaratishda u kosmos tasviri va Galaxy smartfon dizaynidan ilhomlangan:
“Roel van Xoff tomonidan ishlab chiqilgan dizayn kelajak poyabzaliga o‘ziga xoslik beradi. Mazkur krossovka yaqinlaringizga qo‘ng‘iroq qilish imkonini beruvchi dunyodagi birinchi poyabzaldir”, — deydi kompaniya vakillari.
Samsung Shortcut krossovkasini sotuvini joriy etish istagida emas. Jami 6 juft krossovkalar joriy yilning 9—15-iyul kunlari Samsung Members ilovasining xalqaro foydalanuvchilari uchun tanlov sovrini sifatida taqdim etiladi. Konkurs g‘oliblari iyul oyining ikkinchi haftasida e’lon qilinadi.
Izoh (0)