Xavi mavsum yakunlangach, “Barselona”ni tark etadi.
Bu haqida klub rasmiy sayti xabar bermoqda.
Eslatib o‘tamiz, 28-yanvarda Xavi mavsum oxirida “Barselona” murabbiylik postini tark etishini ta’kidlagandi. Keyinchalik bir necha bor bu qarorini o‘zgartirmasligini ham aytib o‘tgandi. Biroq rahbariyat aprel oyida ispaniyalik mutaxassisni jamoada qoldirishga ko‘ndirgandi. Yana vaziyat o‘zgarib, klub murabbiy bilan hamkorlikni to‘xtatdi.
Xavi “Barselona”ni 2021-yilning noyabridan beri boshqarib kelayotgan edi. Uning qo‘l ostida jamoa Ispaniya chempionati va mamlakat Superkubogini qo‘lga kiritdi.
Ayni damda “Barselona” La Liga jadvalida 2-o‘rinni egallab turibdi. Chempionatdagi so‘nggi o‘yin 26-may kuni “Sevilya”ga qarshi bo‘lib o‘tadi. Bu Xavi uchun jamoa bosh murabbiyligidagi so‘nggi o‘yin bo‘ladi.
Izoh (0)