Pul mukofotiga ega chiqqan Shamsiddin Vohidov, Grossmeyster talabini bajargan Madaminov. “Sharjah Masters—2024” musobaqasi yakunlandi

BAA davlatining Sharja shahrida 80 dan ortiq shaxmatchilar o‘rtasida “Sharjah Masters — 2024” turniri o‘z nihoyasiga yetdi. 

Musobaqada 2700 reytingdan yuqori bo‘lgan Arjun Eragisi, Parham Maghsoodloo kabi tajribali shaxmatchilar ham qatnashdi. 

O‘zbekistonlik Muhiddin Madaminov yakunlangan “Sharjah Master—2024” turnirida 2603 performans ko‘rsatib, grossmeysterlikning so‘nggi talabini bajardi. Shunday qilib, Muhiddin O‘zbekistonning 29-grossmeysteriga aylandi. 

Shamsiddin Vohidov turnirni 4-bo‘lib yakunladi. Garchi u dastlabki uchta o‘rindagi shaxmatchi bilan bir xil natija, ya’ni 6,5 ochko to‘plagan bo‘lsa-da, lekin qo‘shimcha natijalarga ko‘ra, uchtalikka kirolmay qoldi. Shamsiddin butun turnir davomida 2860 performans bilan boshqalardan yuqori natija ko‘rsatdi. 

U Arjun Erigaisi, Yu Yangyi, Parham Maghsoodloo kabi kuchli shaxmatchilarni ortda qoldirishga muvaffaq bo‘ldi. 

Shuningdek, turnirda qatnashgan Javohir Sindorov 5,5 ochko, Jahongir Vohidov 3,5 ochko jamg‘ardi.

Shamsiddin Vohidov tashkilotchilar tomonidan 5000 AQSH dollari pul mukofoti bilan taqdirlandi.