Pep Gvardiola: “Agar hamma narsani pul hal qilganida, Manchester Yunayted barcha sovrinlarga ega chiqishi kerak edi”

“Manchester Siti” bosh murabbiyi Pep Gvardiola Angliya Premyer Ligasi klublarining so‘nggi yillardagi sarf-xarajatlari haqida gapirdi.

“Premyer Liga zerikarlimi? Ilgari hammasini pul hal qilardi... Agar hozir ham shunday bo‘lganida, “Yunayted” barcha unvonlarni qo‘lga kiritishi kerak. Ikkinchi o‘rinda “Chelsi”, uchinchi o‘rinda “Arsenal”. Oxirgi besh-olti yil ichida ular “Manchester Siti”dan ko‘ra ko‘proq pul sarfladi”, — deya Gvardiola so‘zlaridan iqtibos keltiradi jurnalist Fabritsio Romano X ijtimoiy tarmog‘idagi (sobiq Twitter) sahifasida.

Ayni damda APL turnir jadvalida Londonning “Arsenal” jamoasi yetakchilik qilmoqda. O‘tkazilgan 37 o‘yindan so‘ng “kanonirlar” hisobida 86 ochko bor. “Manchester Siti” 36 o‘yindan keyin 85 ochko to‘plab ikkinchi o‘rinda bormoqda.

Eslatib o‘tamiz, “shaharliklar” so‘nggi uch mavsumda Angliya chempioni bo‘lgan.