24-aprel kuni AQSH fuqarosi Amanda Godebski 66 yoshli aktrisa Sheron Stounni Los-Anjeles Oliy sudiga berdi. Ayblovchining ta’kidlashicha, 2023-yilda bo‘lib o‘tgan YTHga aktrisa tomonidan sodir etilgan qo‘pol qoidabuzarlik sabab bo‘lgan.
Sheron Stoun avtomobilni boshqarish paytida tezlikni me’yordan oshirgan hamda da’vogar Godebski yurgan yo‘lga xavfli burilish qilgan va natijada avariya sodir bo‘lgan.
Da’vogar so‘zlariga ko‘ra, mashinalar to‘qnashuvi oqibatida uning mulki jiddiy zarar ko‘rgan va mehnat qilish qobiliyatidan mahrum bo‘lgan. Sud jarayonida u tibbiy yordam xarajatlarini ham aytib o‘tdi. Godebski umumiy 35 ming dollarni tashkil etuvchi zararni qoplashni aktrisadan talab qildi.
Bu hodisa Sheron Stounning birinchi marta sudga berilishi emas. 2012-yilda aktrisa ustidan uning sobiq enagasi sudga murojaat qilgan. Sudda Stounga mehnat qonunchiligini buzish va millatiga oid kamsituvchi so‘zlar ishlatish kabi ayblar qo‘yilgan.
Ma’lumot uchun: Sheron Stoun 2001-yilda insultni boshdan kechirgan. Uning qayta tiklanishiga uzoq yillar kerak bo‘ldi, endilikda Stoun doimiy ravishda dorilar qabul qilib yurishi kerak. Unda, shuningdek, xotira bilan bog‘liq muammolar ham kuzatilmoqda.
Izoh (0)