Rossiya droni tunda Ruminiya havo hududiga buzib kirdi. Bu haqda Ruminiya Mudofaa vazirligiga tayanib, Reuters xabar berdi.

Ma’lum qilinishicha, dron havo hududiga Ukrainaga tungi hujumlar vaqti kirib kelgan. U bilan aloqa chegaradagi Kiliya-Veke qishlog‘ining janubi-sharqida uzilgan. Yevropa Ittifoqi va NATO a’zosi bo‘lgan Ruminiya Ukraina bilan 650 kilometr uzunlikdagi quruqlik chegarasiga ega.

Rossiya Dunay daryosi orqali Ukraina portlariga hujum qila boshlaganidan beri dronlar bir necha bor Ruminiya havo hududiga buzib kirdi. Ukraina Qurolli kuchlariga ko‘ra, Rossiya 16-aprel kuni soat 18:00 dan boshlab bitta ballistik raketa va 172 ta dron uchirgan. Havo hujumidan mudofaa bo‘linmalari 147 ta dronni urib tushirgan yoki zararsizlantirgan. Biroq raketa va 20 ta dron sakkizta hududga zarba bergan.

2025-yilda Yevropa havo hududida rus dronlari soni ko‘paydi

O‘tgan yili Daniya va Norvegiya aeroportlari yaqinida ham noma’lum dronlar parvozi qayd etildi. Bu esa Yevropa yetakchilari o‘rtasida Rossiya tahdididan himoyalanish uchun sharqiy chegarada “dron to‘sig‘i” yaratish bo‘yicha munozaralarni kuchaytirdi.

Eng jiddiy hodisalardan biri 10-sentyabrga o‘tar kechasi yuz berdi — Rossiyaning 20 ga yaqin droni Polsha havo hududiga kirdi. O‘shanda Ukrainaga yirik zarba berilayotgan paytda kamida 19 ta dron Polsha chegarasini kesib o‘tgan. Ularni aniqlash va nazoratga olish uchun ilk bor NATO qiruvchi samolyotlari jalb etilgan. Keyinchalik Polsha hududidan 17 ta dron qoldig‘i topilgan.

Ukraina prezidenti Vladimir Zelenskiy Rossiya bu harakatlar orqali Yevropa osmoni himoyasi qanchalik samarali ekanini ataylab sinab ko‘rayotganini aytgan. Rossiya qiruvchi samolyotlari Estoniya, dronlari esa Belgiya havo hududiga ham buzib kirgani qayd etilgan.