Isroil harbiylari 23-aprel kuni Livan janubida “Hizbulloh” guruhining ikki nafar aʼzosini yo‘q qilgan. Bu haqda CNN nashri xabar berdi.
Manbada aytilishicha, Isroil mudofaa kuchlari Isroilning Livan janubidagi havo mudofaasi bo‘linmasi binosiga zarba bergan. Hujum paytida “Hizbulloh” taniqli vakillaridan Husayn Ali Azkul halok bo‘lgan.
Husayn Ali Azkulni Isroil maʼmuriyati o‘ta xavfli terrorchilar ro‘yxatiga kiritgan. Azkul Isroilga qarshi terrorchilik hujumlarini rejalashtirish va uni amalga oshirishda jiddiy ishtirok etganlikda ayblangan.
“Hizbulloh” rasmiylari o‘z xodimi o‘limini tasdiqlagan. O‘lim sababi va vaqtini maʼlum qilmagan.
Shuningdek, Isroil kuchlari Livanning Arzoun hududida “Hizbulloh”ning havo mudofaa bo‘linmasi yana bir aʼzosi — Sajed Sarafandni ham o‘ldirganini daʼvo qilgan. U havo hujumida o‘ldirilgani xabar qilingan.
23-aprel kuni ertalab Isroilga qarashli Jalilaning g‘arbiy qismida, Livan chegarasi yaqinidan harbiy dronlar uchib o‘tishi oqibatida favqulodda holat eʼlon qilingan. Sirenalar ishga tushirilgan. Tel-Aviv rasmiylari chegara nazoratini kuchaytirishni buyurgan.
Isroil va “Hizbulloh” kuchlari 7-oktyabr, HAMAS Isroilga hujum boshlagan paytdan beri transchegaraviy otishmalar va hujumlar olib bormoqda. “Hizbulloh”ning siyosiy rahbariyati falastinlik harbiy guruhlarni qo‘llab-quvvatlagan. Isroilning G‘azoga tinimsiz havo hujumlarini keskin qoralagan.
Izoh (0)