Samarqand va Qashqadaryoda iste’molga yaroqsiz alkogol mahsulotlarini muomalaga kiritilishining oldi olindi.
Bosh prokuratura huzuridagi departamentning Samarqand tuman bo‘limi tomonidan o‘tkazilgan tezkor tadbirda “M.” MCHJ rahbari I.O. savdo do‘konida hech qanday hujjatsiz 82 turdagi umumiy bahosi 169 million so‘mlik jami 8 854 dona iste’molga yaroqsiz alkogol va 626 quti tamaki mahsulotini sotuvga qo‘ygani aniqlanib, ushbu mahsulotlar ashyoviy dalil sifatida olingan.
Shu kabi departamentning Qashqadaryo viloyati Koson tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda “Yangiobod” MFYdagi xonadonda yashovchi B.T. (muqaddam uch marotaba sudlagan) uyining yordamchi xo‘jaligida qo‘lbola usulda alkogol mahsulotlarini ishlab chiqaruvchi yashirin sex tashkil etgani aniqlangan.
Ushbu sexdan 3 000 dona qalbaki aksiz marka, 1 000 dona “Russkaya vodka” nomli yorliq, 1 100 dona shisha idish, 30 litr spirt va boshqa tovar moddiy boyliklari ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)