To‘yga 5 ming dollarga boradigan Jahongir Otajonov xizmat haqi nega buncha qimmatligiga izoh berdi

 Xonanda Jahongir Otajonov “Mirsodiqova bilan” YouTube kanaliga bergan intervyusida to‘ylarga chiqish narxi nega qimmat ekanligi haqida gapirdi. 

— Men nimaga qimmatga boraman? Kamroq ishlash uchun! Birinchidan men ko‘p pul topish uchun qimmatga bormayman, aksincha kamroq ishlash uchun shunday yo‘l tutaman. Men hozir 5 ming dollar so‘rasam, haftasiga yoki oyiga bitta to‘yga boraman. Lekin 500 dollar so‘rasam har kuni 10 ta to‘yga borishim kerak. Men bunday qilishni xohlamayman, chunki bunday qilsam qayerdadir o‘ligim qoladi. Sababi ashula aytish juda zararli inson uchun. Bilasiz, balki eshitgandirsiz, nechta-nechta xonandalar to‘yda o‘lib qolganini. Masalan, Ortiq Otajonov insult, qandli diabet bilan o‘lib ketdi. Sherali Jo‘rayev ham baribir zarar ko‘rdi, chunki insonlarning nazari tegadi. Odamlar seni kasal bo‘lsin deb nazar qilmaydi, lekin baribir tegadi. Kimdir seni yomon ko‘radi, kimdir seni “issiq-sovuq” qilar balki. Dushman ham o‘ziga yarasha bo‘ladi. Shuning uchun men birovdan 5 ming dollar olsam, to‘yga borib sog‘lom ashula aytishim kerak. Kuchanib, qiynalib ashula aytishga mening vijdonim yo‘l qo‘ymaydi. Shu sabab men ko‘p pul so‘rayman, qimmat yurish uchun emas. Hamma bir xil pul berganidan keyin hamma bir xil sifatli musiqa eshitishga haqli. 4 oy to‘y “sezoni” bo‘lsa, 5 ming olib qo‘yib, 118-kuni yomon ahvolda qiynalib qo‘shiq aytishga haqqim yo‘q.

Xonanda “To‘ylarda navbat talashasizmi?” degan savolga ham javob berib o‘tdi.

— Men har doim kelishib boraman. Masalan 20:30 ga borishim kerak bo‘lsa, shu paytga boraman. Endi “plyus-minus” bo‘ladi baribir. Lekin kimdir mening navbatimni olib qo‘ysa farqi yo‘q. Chunki men xizmat haqini oldindan olib, keyin boraman to‘yga. Agar menga gal berishsa qo‘shiq aytaman, gal berishmasa “nasib ekan” deb ketaveraman. Pulni ham qaytarib bermayman, chunki bu mening aybim emas. Ba’zan tadbirlar bekor bo‘lib qoladi, shunday holatda ham pulni qaytarib bermayman. Chunki men uyda psixologik tayyorgarlik ko‘rgan bo‘laman. To‘yga borib kuylash esa men uchun desert”, — deydi xonanda.