Toshkent viloyati Bekobod shahrida Ai-91 markali benzin yonilg‘isini noqonuniy muomalaga kiritilishining oldi olindi, deb xabar beradi Bosh prokuratura huzuridagi departament.
Qayd etilishicha, departamentning Bekobod shahar bo‘limi tomonidan IIB xodimlari bilan hamkorlikda tezkor tadbir o‘tkazilgan. Tadbirda R.R. ismli shaxs (muqaddam sudlangan) noqonuniy daromad orttirish maqsadida fuqaro M.X.ga 2 ming litr Ai-91 markali benzin yonilg‘isini 22 million so‘m va 100 dollarga sotgan vaqtida ushlangan. Shuningdek, R.R. ushbu benzin yonilg‘isini Bekobod shahridagi “G‘.G‘.” MCHJga qarashli shoxobchadan Isuzu rusumli yuk avtomashinasida 200 litr hajmli idishlarga quydirib olib chiqqani aniqlangan.
Mazkur holatlar yuzasidan tergovga qadar tekshiruv harakatlari o‘tkazilmoqda.
Yanvar oxirlarida Shavkat Mirziyoyev bosh vazir Abdulla Aripovga 2025-yildan Ai-80 markali benzindan voz kechish masalasini uzil-kesil hal qilish bo‘yicha topshiriq bergandi. Bir necha kun oldin esa Toshkent shahrida 5,6 tonna benzin yonilg‘isi noqonuniy muomalaga kiritilishining oldi olingan edi.
Izoh (0)