Aktyor Jorj Klunining 18 million dollarlik uyi suv toshqinidan zarar ko‘rdi

Amerikalik aktyor, kinorejissyor Jorj Klunining Temza sohilidagi uyi ikkinchi bor suv toshqini ostida qoldi. Bu haqda Mirror nashri xabar bermoqda.

Yetkazilgan moliyaviy zarar haqida ma’lumot berilmagan, ammo rasmlardan ko‘rinib turibdiki, uyning bog‘i va atrofdagi maydon to‘liq suv bilan qoplangan. Gollivud yulduzining ushbu ko‘chmas mulki 18 million dollarga baholangan.

Joriy yilning yanvar oyida ham xuddi shunday voqea yuz bergan edi: “Henk” bo‘roni sababli Angliya va Uelsda 10 mingdan ortiq uy elektr energiyasiz qolgan edi.

Jorj Klunining ushbu hashamatli uyi II toifali me’moriy yodgorliklar toifasiga kiritilgan. Unda aktyor rafiqasi Amalya hamda egizak farzandlari Ella va Aleksandr bilan istiqomat qiladi. Uy 2014-yilda sotib olingan.

Saroy kabi ulkan xonadonda 9 ta yotoqxona va 4 gektar bog‘ bor.