Hindistonda sun’iy intellekt startapining bosh direktori Suchana Seth Goa shtatida to‘rt yoshli o‘g‘lini o‘ldirganlikda ayblanib hibsga olindi, deb yozmoqda Hindustan Times.
Bangalorda yashovchi Seth 7-yanvar kuni Karnataka shtatida politsiya tomonidan hibsga olingan. Sud uni olti sutkaga hibsda qoldirdi. Politsiya ma’lumotlariga ko‘ra, 39 yoshli tadbirkor ayol Shimoliy Goadagi mehmonxonada o‘z o‘g‘lini o‘ldirgan, so‘ngra jasad bilan taksida Bangalorga qochib ketgan.
Seth va uning bolasi mehmonxonaga 6-yanvar kuni joylashgan. Xonani tozalash bilan shug‘ullangan mehmonxona xodimi tekshiruvdan so‘ng qon dog‘larini payqab qolgan va mehmonxona rahbariyati bu haqda politsiyaga xabar bergan. Ayol mehmonxonadan chiqishdan oldin unga taksi chaqirib berishlarini so‘ragan.
Politsiya unga qo‘ng‘iroq qilib, qon izlari va o‘g‘li haqida so‘raydi. Seth dog‘larni hayz bilan bog‘ladi, bolasi esa Margao shahridagi dugonasi bilan birga ekanini aytadi. Biroq uning politsiyaga bergan manzili yolg‘on bo‘lib chiqdi. Natijada tadbirkor ayol qo‘lga olindi. Politsiya xodimlari uning sumkasini tekshirib, ichidan bolaning jasadini topgan.
Seth so‘roq paytida eridan alohida yashashi va hozir ajrashish jarayoni ko‘rib chiqilayotganini aytdi. Ayolning so‘zlariga ko‘ra, u o‘g‘li ustidan vasiylik masalasi bo‘yicha kelishmovchilikdan xafa bo‘lgan. Uning eri hozir Jakartada va voqea haqida xabardor qilingan.
LinkedIn’dagi sahifasiga ko‘ra, Seth Mindful AI Lab bosh direktori va sun’iy intellekt etikasi bo‘yicha mutaxassis. U “2021-yilda sun’iy intellekt etikasi bo‘yicha 100 ta eng yaxshi ayollardan biri” bo‘lgandi, deyiladi nashr xabarida.
Izoh (0)