Teatr va kino aktrisasi Malika Avazova “Aytilmagan gaplar” ko‘rsatuviga bergan intevyusida sevib oila qurgani va to‘rt yarim yil davomida farzandsizlikdan qiynalgani haqida so‘zlab berdi.
— Ayrim insonlar “Hayotda 7-12 yillab ham farzand kutib yashaganlar bor-ku”, deyishi mumkin. Ammo oila qurgandan keyin bir oy, bir yilning o‘tishi qanchalik qiyinligini yaxshi bilaman. Bu holatning qanchalik qiyinligini ayol va uning yostig‘i biladi xolos. Har oy yangilikni kutish va qo‘shimchasiga tanish-bilishlarning savoli ko‘ngilga qanchalik og‘ir botishini yaxshi bilaman. Ayrim insonlar bizga “Qoninglar to‘g‘ri kelmadi, ajrashinglar”, deb maslahat ham bergan. Lekin qaynonam biror marta ta’na qilmadi, hatto o‘zim aytmagunimga qadar bu haqda so‘ragani ham yo‘q. Yashirinib yig‘lagan paytlarim turmush o‘rtog‘im kuldirib, kayifyatimni ko‘tarishga urinardi. Xudo shukurki, bu sinovdan o‘tib, quvonchli kunlarga ham yetdik.
Hozirgi kunda bir yil farzand bo‘lmasa ajrashib ketadigan oilalar ko‘p. Oila o‘yinchoq emas, nikoh Yaratganning oldida berilgan vaʼda hisoblanadi.
Menga ham oson bo‘lgani yo‘q. Qiynaldim, hatto qaynonam bilan birga bola asrab olish haqida ham o‘yladik. Ikkimiz Mehribonlik uyidan farzand qidirishni boshladik. Turmush o‘rtog‘im bu gapimni indamay eshitdi va “Menga o‘zing farzand dunyoga keltirib ber”, dedilar. Bu haqda aytish qanchalik og‘ir bo‘lmasin, turmush o‘rtog‘imga boshqa ayolga uylanishni taklif qildim. Chunki turmush o‘rtog‘im 30 dan oshgan, farzandsizlik og‘ir botganidan do‘stlariga ham qo‘shilmay qo‘ygandi. “Men sen bilan ajrashish uchun oila qurmaganman”, dedilar. “Agar men bilan ajrashishni istamasangiz, mayli uyingizda qolib xizmatingizni qilaman. Faqat iltimos uylaning”, dedim, — deydi aktrisa Malika Avazova.
Aktrisa homilasi egizak ekanligini eshitganida qanday ahvolga tushgani va turmush o‘rtog‘i bu yangilikni yig‘lab qarshi olgani haqida aytdi.
— O‘tgan yili qish faslida teatrda kuniga to‘rt mahal spektakl qo‘ydim. Sovuq, ish ko‘p payti belim bilan yiqilib tushdim. O‘sha paytda o‘zimdagi o‘zgarishlarni sezib yurgandim. Ultratovush tekshiruviga borsak kelasi oy qayta ko‘rikka borishim kerakligini aytishdi. Qayta tekshiruvga borganimda 4 haftalik homilador ekanimni bildim. U paytdagi ahvolimizni hech bir so‘z bilan tasvirlab berolmayman. Turmush o‘rtog‘im mashinani arang boshqarib uyga keldi va xonamizga kirib, uzoq vaqt yig‘ladi. O‘shanda erkak kishining yig‘lashini birinchi marta ko‘rdim.
Bola jinsini aniqlash uchun borganimizda, ikkita nuqtacha borligini aytishdi. Xayolimga bu birorta o‘simta bo‘lsa kerak, degan fikr keldi. “Uni olib tashlashning iloji yo‘qmi, u bola bilan birga rivojlanadi-yu”, dedim. Shifokor kulib “Ha, nega ikkitasini boqolmaysizmi?” dedi. O‘shanda turmush o‘rtog‘im bilan klinikadan chiqib, osmonga qarab 15 daqiqa yig‘lagandik. Shukurki, sabrimizning mevasi bo‘lib egizak farzandlarimiz dunyoga keldi, — deydi aktrisa.
Izoh (0)