Mamlakatda taʼlim, bank, qurilish va davlat xaridlari sohalarida korrupsiyaviy xatarlar yuqori darajada saqlanib qolmoqda. Bu haqda Korrupsiyaga qarshi kurashish agentligi masʼul xodimi Azamat Ergashev “Daryo” muxbiriga bergan intervyusida maʼlum qildi.
Maktabgacha va maktab taʼlimi vazirligida 9-dekabr — Xalqaro korrupsiyaga qarshi kurashish kuni munosabati bilan “Ochiq eshiklar kuni” tadbiri tashkil etildi. Muloqot doirasida Azamat Ergashev jurnalistlar savollariga javob qaytardi. Aksilkorrupsiya agentligi maʼsulining aytishicha, respublikada qator sohalarda korrupsiyaviy xatarlar hamon yuqori.
“Tan olishimiz kerak, deyarli barcha davlat tashkilotlarida korrupsiya mavjud. Biz buning amaliy taʼsirini ko‘p holatlarda ko‘rdik. Tahlillarga qarasak, hozir O‘zbekistonda oliy taʼlim, maktabgacha va maktab taʼlimi, bank, qurilish hamda davlat xaridlari sohasida korrupsiya eng ko‘p uchaydi. Bu illat xalq ongiga ham shu darajada singib ketganki, odamlarda ‘agar pul bermasak, oliy o‘quv yurtiga kira olmaymiz, farzandimizni bog‘cha yoki maktabga joylashtira olmaymiz’, degan tuyg‘u shakllanib ulgurgan”, — deydi u.
Azamat Ergashev maktab va maktabgacha taʼlim sohasida aniqlangan korrupsion holatlarga misol keltirdi.
“Maktablarga dars taqsimoti sohasida, davlat xaridlari, xodimlarni ishga olishda juda ko‘p korrupsion holatlar uchramoqda. Masalan, bizning agentlik tomonidan bir necha korrupsiyaviy holatlar aniqlangan. Xususan, Navoiy viloyat xalq taʼlimi bo‘limi mansabdor shaxslari tumandagi o‘qituvchilarga ustama belgilashda davlat manfaatlariga juda katta zarar yetkazgan holatlari aniqlandi. Hozirda Navoiy viloyat prokuraturasi tomonidan tergov qilinib, material sud idoralariga chiqarilgan.
Yana bir musol, “Zo‘rpalast” loyihasi doirasida Rossiyadan O‘zbekistonga 150 nafar o‘qituvchi kelishi kutilgan. Lekin ulardan 130 nafari kelgan, qolgan 20 nafari kelmagan. Malaka oshirish instituti mansabdor shaxslari ayrim shaxslar bilan til biriktirib, kelmagan o‘qituvchilar uchun ham yashash, ovqatlanish va boshqa xarajatlarni hisoblab, pullarni bir paytlar institut prorektori taʼsischiligida tuzilgan xo‘jalik yurituvchi subektga o‘tkazgan va o‘zlashtirgan holatlari aniqlandi. Bu bo‘yicha Toshkent shahar prokuraturasi tomonidan jinoyat ishi qo‘zg‘atilib, huquqbuzarlarga chora ko‘rildi”, — dedi agentlik xodimi.
Azamat Ergashev suhbat davomida yana bir korrupsiyaviy jinoyat bo‘yicha maaʼlumot berdi.
“Maktabgacha va maktab taʼlimi vazirligi markaziy mahkamasi tomonidan “Umid nihollari” tadbirlari uchun ajratilgan pullardan 20 milliard so‘mini o‘z manfaati uchun o‘zlashtirib yuborilganlik holati aniqlandi. Hozirda Shayhontohur tuman sudida mazkur ish ko‘rilmoqda” — deya maʼlum qildi suhbatdosh.
Avvalroq Maktabgacha va maktab taʼlimi vazirligi tizimida nazorat tadbirlari o‘tkazilgani, o‘rganishlar natijasida joriy yilning 9 oyi davomida 954,9 milliard so‘mlik moliyaviy xato va kamchiliklar aniqlangani xabar qilingandi.
Izoh (0)