Norvegiya bosh vaziri Yonas Gar Styore zarurat tug‘ilsa Rossiya bilan chegarani yopishga tayyor ekanini ma’lum qildi. U hukumat Finlandiya va Estoniyadagi vaziyatni kuzatib borayotganini bildirdi.
TV 2 telekanaliga ko‘ra, matbuot anjumani vaqtida jurnalistlar bosh vazirdan Norvegiya Finlandiya ortidan borib, Rossiya bilan chegaradagi yagona nazorat-o‘tkazish punkti — “Sturskug”ni yopadimi degan savolni bergan. “Zarurat tug‘ilsa”, — deya javob qaytargan Styore.
Finlandiya 2023-yil 18-noyabrdan boshlab 2024-yil 18-fevralga qadar Rossiya bilan chegaradagi to‘rtta — Vaalimaa, Nuyyamaa, Imatra va Niirala nazorat-o‘tkazish punktlarini yopdi. Buni Rossiya hududidan migrantlar oqib kelayotgani bilan izohlandi.
Finlandiya hukumati 25-noyabr kechasi yana to‘rtta nazorat-o‘tkazish punkti yopilishini va faqat bitta — Raya-Yooseppi ochiq qolishini ma’lum qildi. Shuningdek, o‘tgan hafta estoniyalik chegarachilar Rossiya bilan chegara tanklarga qarshi to‘siqlarni o‘rnatgan edi.
Izoh (0)