Gollivud yulduzi Bred Pitt 40 million AQSH dollariga Markaziy Kaliforniyaning Karmel-Xaylend hududidan hashamatli uy sotib oldi va o‘z nomidagi ko‘chmas mulklar sonini yana bittaga ko‘paytirdi. Bu mazkur hovli barpo etilganidan beri amalga oshirilgan eng qimmat kelishuvlardan biri hisoblanadi.
Uy 1918-yilda taniqli meʼmor Charlz Grin tomonidan qurilgan. Aka-uka Charlz va Genri Grinlar Kaliforniyadagi bungalolar — tomi tekis ko‘rinishda yopilgan bir qavatli uylar uslubining yirik namoyondalaridan bo‘lishgan. Ammo ushbu loyihada meʼmor o‘zi sevgan uslubdan voz kechib, uyni shu yerdagi konlardan qazib olingan qumtosh va granit bilan bezatgan.
O‘z vaqtida tadbirkor va yozuvchi Deniyel Jeyms uchun qurilgan uy devorlari qoya bilan tutashib ketgandek ko‘rinadi, ularning o‘ziga xos tuzilishi odatiy loyihalardan keskin ajralib turadi. Uyning barcha xonalari bitta qavatda joylashgan.
Bred Pitt noodatiy ko‘rinishdagi uylarni kolleksiya qilishga qiziqadi, uning dunyo bo‘ylab turli hududlarda joylashgan ko‘plab ko‘chmas mulklari mavjud. Aktyor 1994-yilda Los-Anjelesning Los-Felis hududidan 1,7 million dollar evaziga kamtarona uy xarid qilgan, 2000-yilda esa Santa Barbaradan, okeanning shimoliy sohilidan maydoni 4,5 gektarga teng keladigan hovli sotib olgan.
Ijodkor 2008-yilda Fransiyadan 28,4 dollar evaziga Shato Miraval hovlisini xarid qilgan va bu yerda Anjelina Joli bilan birgalikda farzandlarini tarbiya qilishni rejalashtirgan edi. 2016-yilda ajrashishga qaror qilgan juftlik Shato Miraval masalasida haligacha tortishib kelishadi.
